Ki pulit bad nongñiah taksi ki long kum ‘Tom and Jerry’ shiphang ïadom shiphang ïatreilang

Shillong, Risaw 27

Ka Synjuk ki Nongñiah Taksi Sor bad Khapsor ka la leit ban buh da ka jingthoh ban kyrpad ïa ka Deputy Commissioner, East Khasi Hills District, u Superintendent of Police Traffic bad ïa u District Transport Officer, East Khasi Hills Shillong ba kin weng noh ïa ka jingphah khynra ïa ki Local Taxi da kaba kynnoh ba thep bun briew palat.

Haba ïakren bad u Bah Pynsuk Youroi uba dei u General Secretary ka synjuk, u la ong ba ki pulit pynïaid kali bad ki nongñiah taksi ki long kum u ‘Tom and Jerry’ namar shiphang ki ïadom shiphang ki ïatreilang na ka bynta ka jingbit jingbiang haba pynkylluid ïa ka sor Shillong.

U la ong ba ka jingkhynra kyndit-kynsan ki pulit ïa ka jingthep briew ki ‘local taxi’ ha Shillong ka long kumba riam ïa ki katba ki dang kamai, ki la shah pynhiar bad daiñ kuna ruh.

U la ong barabor ki ju thep lai ngut shadien bad iwei shakhmat, hynrei don ki por ba hap thep saw ngut lada ki wan shi bahaïing ne shi paralok khamtam lei kiba kamai sha khapsor. Nalor kata, u Bah Pynsuk u la pynpaw ba kam don jingmut ban hiar thma ïa ki nongñiah taksi namar ki dei tang ki nongbylla bad ki daiñ kuna haduh T.200 lada ki ïohi ba thep palat ïa ka saw ngut.

U la ong ba kane ka jingthep san ngut ka la ïaid la slem hynrei ki khlem ai lypa ka jingpynbna, pynban ki la shu talasi beit bad daiñ kuna da kaba aidaw ba dei ban thep beit lai ngut shadien bad iwei shakhmat.

“Ngi ong ïa ki pulit lada ngi thep lai ngut shadien iwei shakhmat lada ki wan san ngut shi bahaïing ne shi paralok ym lah ban ong ïa iwei ban phah ïaid da ka kjat hynrei ngi hap ban thep lang tang ba kin poi sha ïing” u la ong.

Namar kata, u don jingkyrmen ba kane ka jingkyrpad jong ka synjuk ba ka sorkar kan sngap ba kin kit briew beit saw ngut shadien bad iwei shakhmat.