Tura, Risaw 27
Ka Garo Baptist Convention (GBC) ka la pynpaw ka jingsngewkhia bad ka jingsngewsih halor ka jingbym shah kynthup jong ka Ktien Garo ne A·chik ha ka thup ki 38 tylli ki jait ktien ki ban ïoh rung ha ka Khyrnit ba 8 ka Riti Synshar ka Ri kumba la pynbna dang shen da ka tnat Pohïing ka Sorkar Pdeng.
“Ka ktien bad ka thoh ka tar ki Garo ka la nang roi na ka por sha ka por bad la kren da kumba 1.5 ‘million’ ngut ki briew ha ka Thaiñ Shatei Lam Mihngi ka ri bad khamtam ha ki 5 tylli ki distrik jong ka Meghalaya. Haba kheiñ kyllum lang, kumba 33% na ka jingbun briew ka Jylla ki kren ïa ka ktien Garo ne A·chik. Ha ka liang ka pule-puthi, ka ktien ka la poi ha ka kyrdan pule ‘Doctorate’ bad da ki hajar ngut ki samla pule ki la ïaid shakhmat bad ka jingpule jong ki ha ka ktien Garo,” la ong ka GBC.
Haba kdew ba ka jingdawa ban pynrung ïa ka ktien Garo ha ka Khyrnit ba 8 ka Riti Synshar ka Ri, ka dei ka mat kaba la slem bah bad kaba shong hok, ka kynhun ka la kyrpad ïa ka Sorkar India kumjuh ïa ka Sorkar Jylla ban pyrkhat ha ka ban khmih bniah mardor bad pynkylla ïa ka thup kaba dang shu pyllait shen kumjuh ban kynthup ïa ka ktien Garo ne A·chik ha ka thup ba la dep pynbeit.
Kitei ki 38 tylli ki jait ktien ki kynthup ïa ka Angika, Banjara, Bazika, Bhojpuri, Bhoti, Bhotia, Bundelkhandi, Chhattisgarhi, Dhatki, English, Garhwali (Pahari), Gondi, Gujjar/Gujjari, Ho, Kachachhi, Kamtapuri, Karbi, Khasi, Kodava (Coorg), Kokborok, Kumaoni (Pahari), Kurak, Kurmali, Lepcha, Limbu, Mizo (Lushai), Magahi, Mundari, Nagpuri, Nicobarese, Pahari (Himachali), Pali, Rajasthani, Sambalpuri/Kosali, Shaurseni (Prakrit), Siraiki, Tenyidi, bad Tulu.
Ka Khyrnit kaba 8 ka Riti Synshar ka Ri ïa mynta ka don 22 tylli ki jait ktien hapoh jong ka – Assamese, Bengali, Bodo, Dogri, Gujarati, Hindi, Kannada, Kashmiri, Konkani, Maithili, Malayalam, Manipuri, Marathi, Nepali, Oriya, Punjabi, Sanskrit, Santhali, Sindhi, Tamil, Telugu, bad Urdu.
Napdeng kitei, ha kaba sdang la pynrung ïa 14 tylli na ki ha ka Riti Synshar ka Ri. Ha kajuh ka por, la pynrung sa ïa ka Sindhi ha u snem 1967.
Nalor kane, sa 3 tylli ki ktien ba kynthup ïa ka Konkani, Manipuri, bad Nepali – la pynrung ha u snem 1992, katba ïa ka Bodo, Dogri, Maithili, bad Santhali la pynrung ha u snem 2004.
