Jerusalem, Risaw 27 (UNI)
Ki shipai ka Israel ha ka Sngi Thohdieng ki la pynbna ba hynnin ka miet, ki la leit tur na ryngkew sha Gaza Strip ban thombor ïa ki lehnoh Hamas.
Katkum u kyrwoh ba la pynmih da ka Israeli Defence Forces (IDF), la synran ïa ki shipai da ki liengsuiñ ïapom bad kiwei ki tiar siat ha ka por ba ki la rung sha ka thaiñ ba shapdeng jong ka Gaza Strip.
“Ki shipai Israel ki la rung sha kawei ka jaka kaba don hajan ka jingker sainar ha ka nongrit ba la tip kum ka Beit Hanoun ha ka thaiñ Shatei jong ka Gaza Strip, bad ka Bureij Camp kaba don hapdeng jong ka Gaza Strip,” la ïathuh ki bor pahara ka Palestine bad Israel ha ka Xinhua.
Hadien ba la kut ka jingleit khynra, ki shipai ki la wanphai noh sha Israel. Kane ka dei ka sien ba lai ba ki shipai Israel ki la leit tur na ryngkew sha Gaza Strip.
Ka Israel mynta ka la pynkhreh ban leit tur beit na ryngkew sha Gaza Strip ban ïakhun pyrshah ïa ki lehnoh ka Hamas.
