Shillong, Risaw:
Ki briew kiba sah ha ki mala jong ka Payal Cinema barim kat haduh mynta kim pat nud ban wan sah namar ka jingpluh jong kawei ka ïing kaba don mar syndah ha Khyndailad ha ka 14 tarik mynta u bnai.
Haba ïoh ban leit peit biang ïa kane ka ïing mala kaba la pluh la lap ba kane ka ïing ka la sah khongreng namar ka jingshah bamduh ha ka ding ha ka nohphai sngi jong ka 14 tarik Risaw. Na ka liang ki briew kiba ïohi bad peit ïa ka jingjia ha rynsan lad pathai ha kato ka sngi ki la tieng bad rah mynsiem namar ïoh ka ding kan pur sha kiwei pat ki ïing ba marjan.
Ha kane ka jingleit peit u nonglum khubor, la ïohi ba ki kamra jong ka Payal Cinema barim ki la sah khongreng namar bym don ba wan sah shuh naduh ba ki la phet lamwir ha kato ka sngi. Katba ka bynta sha khrum jong ka Payal Cinema la ïohi ba ki dang don kiba sah.
Katkum ka jingïathuh kiba sah marjan ki la pynpaw ba don bok ba kane ka ding ka shu klang tang ha ki mala jong katei ka ïing paki dulan, hynrei lada jia ba ki thylliej ding ki her ne saphriang kaba buh jingma ka dei ïa ki ïing tin kiba don sharum.
Nalor kata, ki la ïathuh ba mar shu pluh katei ka ïing ha Khyndailad kiba sah marjan ki la phet kulmar na ki ïing sah bad rynsien kulmar na ki kynroh ban lait im.
Shuh shuh ki la ïathuh ban nym pur sha kiwei ki ïing ki la pynshitom ban synreit da ka um baroh shi sngi kat haduh ba katei ka ding kaba klang ka la shu poi tang ha jrong slep ka Payal Cinema barim.
Kum ban shu pynkynmaw, ka jingpluh ka ïing ha Khyndailad ka la shim ïa ka jingim jong uwei u briew uba trei ha katei ka dukan bad la lah ban pynlip ïa ka ding haduh ka janmiet jong ka Sngi U Blei.
