Jowai, Risaw:
U MLA ka Jowai, Bah Wailadmiki Shylla uba dei ruh u Chairman jong ka MUDA ha ka Sngi Palei u la pyllait paidbah ïa ar tylli ki trok kit ñiut, ka trok kit um nalor ka Organic Waste Converters (Composting Machines), bad Baling Machine ha ka jingïalang kaba la long ha phyllaw ka shlem treikam ka JMB ha Khimusniang, Jowai.
Hashwa ka jingpyllait paidbah, ka la don ka jingïalang kaba la pynïaid da u Chairman ka JMB u Bah Lasooki Lakiang ha ka jingdonlang ka Chief Executive Officer, JMB ka Kong DV Lyngdoh MCS, u Dalloi Jowai u Puramon Kynjing nalor kiwei kiwei.
U Bah Wailadmiki Shylla ha ka jingkren u la ai khublei ïa ki ophisar kiba la trei borbah ban poi sha kane ka thong hadien bun snem jong ka jingshah kynthoh ha kaba ïadei bad u ñiut kumjuh ka jaboh jabaiñ ka sor Jowai.
Hynrei, u la ong ba mynta u la ïeng da ka jingsngew sarong bad u sngew donbok shibun namar lyngba ka jingtrei shitom ka jong u ha ryngkat ki ophisar bad ki nongtrei jong ka Board, ki la lah ban shim ïa ki sienjam ban weng noh ïa baroh kine ki jingeh.
Ha kajuh ka por u MLA u la ai khublei kyrpang ruh ïa ka Seinraij Jowai bad Sabahmuswang halor ka jingailad jong ki ïa ka Jowai Municipal Board na ka bynta ban shna ïa ki Recovery Center.
U la kren ruh ha kaba ïadei bad ki projek ba la mang lyngba ka fifteen finance na ka bynta ki shnong bapher bapher ha sor Jowai bad u la kular ruh ban shimkhia ha kaba ïadei bad ki jingeh jong ki nongtrei jong JMB.
