Shillong, Risaw 27
Ki khliehduh (principal) jong ki skul ki la pynsngew ba donkam ban pynlong ïa ka sobjek ‘Jingkheiñ’ kum kaba kongsan tam bad donkam beit ban shim da ki khynnah skul ha kaba la ai jingmut ruh ban pynkylla ïa ki kot pule khnang ba ki lynnong ai jinghikai ruh kin ïaryngkat bad kiwei pat ki rukom ai jinghikai ha kylleng ka ri.
Kine ki nonghikai ki la pynsngew ïa kane ha ka jingïalang bad u Myntri ka tnat Pule-Dangle u Rakkam A Sangma ha ka Sngi Thohdieng.
U Rakkam u la ong ba ka Sorkar Jylla shen kan sa shim rai haba ïadei bad ka sobjek ‘Jingkheiñ’ ban pynlong kum kaba kongsan kaba dei ban shim beit da ki khynnah skul.
U Rakkam u la ong ba ki Principal jong ki skul ki la pynpaw ka jingsngewkhia haba ïadei bad jingmih na ka rukom bad ki la ai jingmut ban pynkylla ïa ki lynnong jinghikai khnang ban ïahap lem bad kiwei pat ki rukom ai jinghikai ha kiwei pat ki jaka.
U la ong ba kiba bun ki khynnah skul lada ki ïohlad kin jied ban nym shim ïa ka sobjek ‘Jingkheiñ’ bad lada ailad, baroh kin kwah tang kaba kham suk.
Shuh shuh u la pyntip ba ka tnat Pule-Dangle ka la bthah ïa ka Directorate of Educational Research and Training (DERT) ban kham wad bniah halor ka jinglah jong ki khynnah skul ha shwa ban shim rai ban ailad ïa ki khynnah ban jied ïa ka sobjek ‘Jingkheiñ’ kum ka sobjek kaba kongsan ne ban ailad ïa ki ban nym shim ïa kane ka sobjek.
