Shillong, Risaw 27
Ka Meghalaya Peoples United Front (MPUF) ka la ther tyngeh ïa ka sorkar Meghalaya Democratic Alliance (MDA) kaba pynpaw ba ka thrang ban wanrah lynti rel sha East Jaiñtia Hills District da kaba kynnoh ba kane ka jingthmu ka dei ban pynkamai spah ïa katto-katne ym ïa u paidbah.
Ka MPUF ka la kynnoh ba ka jingpyrshang jong ka sorkar MDA ba la ïalam da ka National People’s Party (NPP) ban pynpoi ïa ka lynti rel sha East Jaiñtia Hills District ka long tang ban pynkamai spah ïa ki katto-katne ngut ki briew hynrei ym ïa u paidbah ba bun ba lang. Kumba la ïohi ka jingthmu ban wanrah ïa ka lynti rel khamtam sha East Jaiñtia Hills ka long ban klun ïa ka spah ka phew ha kaba ïadei bad u mar poh khyndew jong ki nongshong shnong.
Na ka liang u President ka MPUF, Bah Dawanpoimi Laloo, haba kren bad ki nongthoh khubor ha ka Sngi Palei, u la ong ba ka seng kam pyrshah ïa ka roi ka par hynrei lada ka sorkar ka thmu ban pynpoi lynti rel ha East Jaiñtia Hills District ka dei ban pynbiang shwa ïa ki aiñ ki kanun kiba pyrkhing ïa ka jingwan rung kyrthep jong ki mynder ri.
“Kaba nyngkong ka sorkar ka dei ban wanrah ïa ki lad jingïada ban tehlakam ïa ka jingwan rung kyrthep jong ki bar jylla bad ba ar, ka dei ba kan pyni ïa ngi kum ki nongïalam sengbhalang ba ka jingmut jong ka sorkar ka dei ban long kaba shai haba ïadei bad kane”, la ong u Bah Laloo.
Utei u nongïalam u la bynrap da kaba ong ba ka seng kan ym ailad ïano-ïano ban leh ïa kano-kano ka kam ka ban ktah ïa ka imlang ka sahlang. Ka seng ka dawa ruh ba ha shwa ban wanrah ïa ka lynti rel, ka sorkar ka dei ban pyntreikam ïa ka Inner Line Permit (ILP) ne ki aiñ ki ban ïada ïa ka jylla.
“Ngin nym ailad bad ngin bym aili ïano-ïano ban leh ïa kino-kino ki kam na ka bynta ban ktah ïa ka imlang ka sahlang jong ngi, kumta hashwa ban wanrah ïa ka lynti rel, phi dei ban ai shwa ha ngi ïa ka lad jingïada kum ka ILP khnang ba ngin nym shah tyllep ha ka jingwan jong ka lynti rel”, la kubur u Bah Laloo.
Nalor kata, ki la kyntu ruh ïa u MLA ka Khliehriat, Bah Kyrmen Shylla uba dei u Myntri jong ka sorkar Jylla bad MLA jong ka Sutnga-Saipung, Kong Santa Mary Shylla ba kin pynsngew sha ka sorkar halor ka jingpyrshah jong ki paidbah ban pynpoi ia ka lynti rel
