New Delhi, Risaw 27
Ka thma hapdeng ka Israel bad ka Hamas ka la rung sha ka sngi kaba 21 ha ka Sngi Thohdieng bad haduh mynta, palat 1,400 ngut ki la shah pynïap ha Israel katba ki la don palat 7,000 ngut kiba la shah pynïap ha Gaza Strip kaba dei ka jaka kaba la pynïaid da ka Hamas.
Kane ka thma ka la sdang ha ka 7 tarik Risaw hadien ba ki lehnoh Hamas ki la rung na Gaza Strip sha Israel ban thombor bad pynïap bad rahbor ïa ki nongshong shnong bad ki bor pahara ka Israel. Na ka liang ka Israel pat ka la pynhiar kput da kaba ther da ki bom ïa ka Gaza Strip da ka jingthmu ban pynïap ïa ki nongïalam bad dkhot ka Hamas.
Nalor ka jingïakhun na suiñ, na ka liang ki shipai Israel ha ka Sngi Thohdieng ki la nang pynjur ïa ka jingrung shapoh Gaza kum shi bynta na ka jingpynkhreh ban ïakhun markhmat ïa ki lehnoh Hamas. Hynrei kawei na ki diengpyngkiang kaba buh jingeh ïa ki shipai Israel ka long ka jingdon jong ki ‘tunnel’ lane ki jaka rieh ba don ha khrum ka sla khyndew jong ka Hamas. La ngeit ba ïa kiba bun ngut ki briew kiba ka la rahbor na Israel, ka Hamas ka la buh ïa kita ha kine ki jaka khrum.
Ki khubor ki ïathuh ba ka Hamas ka don bun jait ki ‘tunnel’ kiba jrong da ki spah kilometre bad kiba jylliew kumba 80 metre.
Khnang ban ïakhun ïa ki dkhot ka Hamas kiba rieh tngen ha kita ki ‘tunnel’, ki khubor ki ïathuh ba ka Israel ka dang shna ïa ki bom bakyrpang ba la tip kum ki ‘Sponge Bomb’. Kine ki jait bom mar ïa bthei ki pynmih ïa ka kynja thnam sabon bad tang hadien katto katne por, kata ka thnam sabon ka la kylla eh noh.
Katkum ka khubor ba la mih ha “The Telegraph”, la ong ba ka Israel ka la pyrshang ban pynbthei ïa kitei ki bom ban ïoh khang lut ïa ki jaka rung jaka mih sha ki ‘tunnel’ jong ka Hamas khnang ban ym ailad ïa ki dkhot kane ka kynhun ba kin mih bad phet na kita ki jaka khrum.
La ong ba ki shipai Israeli Defense Forces (IDF) ki la pyndonkam ïa kine ki bom ha ka por ba ki la pynlong ïa ka jingpyrshang ha khappud bad ka Gaza ha u snem 2021.
Napdeng ki kynhun shipai ba la pyntbit ban rung sha kine ki jaka khrum ban ïakhun ïa ki lehnoh Hamas, ka Yahalom, kaba don ïa ki ‘Commando’ na ka Combat Engineering Corps, ki dei kiba la ïoh ïa ka jinghikai kaba paka ban wad bad pynjulor ïa ki jaka ba don ha khrum ka sla khyndew.
Ïa ka Hamas la seng ha Gaza ha u snem 1987, bad ki khubor ki ïathuh ba ka la sdang ban tih ïa ki jaka hapoh jong ka sla khyndew ha ki snem 1990 shaneng. Ka jingdon jong kine ki jaka khrum ka long kawei na ki daw ba ka Hamas ka kham khlaiñ ha Gaza ban ha West Bank.
Ka jingtih ïa ki ‘tunnel’ ka la kham suk naduh u snem 2005 hadien ba ka Israel ka la weng noh ïa ki shipai bad nongshong shnong jong ka na Gaza, bad hadien ba ka Hamas ka la wan ha ka bor synshar ha u snem 2006.
