Shillong, Risaw 29
Saw ngut ki dkhot ka Voice of the People Party (VPP) Mawryngkneng konstitwensi ki la pan tiket na ka seng lajong ba ki kwah ban ïakhun ïa ka ilekshon MDC na Soh-ryng kham konstitwensi sha ka Khasi Hills Autonomous District Council (KHADC).
Ïa ka kyrteng jong kine saw ngut, ka VPP Mawryngkneng Circle hapoh ka jingtip u MLA Bah Heavingstone Khar-pran ki la phah sha u President ka VPP, Bah Ardent Basaïawmoit.
La sngewthuh ba ka VPP Sengkmie lyngba ka Election Committee kan sa shim tang kawei ka rai ban jied tang kawei ka kyrteng na bynta ban pyntikna ban ïoh jingjop ha ka ilekshon MDC 2024.
Haba ïoh ban ïakren bad u Bah Kharpran, MLA ka VPP na Mawryngkneng konstitwensi, u la ïathuh ba ki don haduh saw ngut ki dkhot ka seng VPP kiba la pan tiket bad ka jylli (circle) ka la phah ïa ki kyrteng baroh saw ngut sha u President ka VPP Sengkmie. U la ïathuh ba ki don ar ngut kiba la pan tiket, hynrei ki la kynrandien noh namar uwei u dei uba treikam ophis.
“Haduh mynta kiba pan tiket na ka VPP ban ïakhun ïa ka ilekshon MDC na Sohryngkham konstitwensi ki don tang saw ngut hynrei ïa kiwei ki bym shym la ïaid na ka kti jong nga, ngam tip eiei” u la ong.
Nalor kane, u la ïathuh ba napdeng kine ki saw ngut kiba pan tiket ki la kular ba lada yn ai tiket ïa uwei kin ïatreilang beit ban pynkhlaiñ biang ïa ka seng VPP.
U la ïathuh biang ba shwa ban pynbna ïa ka tiket MDC, ka VPP kan sa shong pyrkhat ha ka CEC.
Haba kylli ïa ki kyrteng jong ki dkhot kiba pan tiket, u Bah Kharpran um shym la kwah ban pynpaw kyrteng pynban u la shu pyntip ba ki don saw ngut kiba pan tiket.
Ha kajuh ka por u don jingkyrmen ba lada ïoh uwei na kine ki saw ngut kiba la pan tiket ka VPP kan ïoh biang ïa ka jingjop. Lada ka VPP kan pynïeng kyrtong kan hap ïakhun pyrshah ïa u MDC ba mynta Bah Pynïaid Sing Syiem uba dei u CEM ka KHADC ba mynta.
Kum ban shu pynkynmaw, ka VPP ka la sei da u Bah Heavingstone Kharpran ha ka ilekshon MLA bad u la lah ban pynliem ïa u Bah Pynïaid Sing Syiem uba dei ha kajuh ka por u MLA bad MDC.
