Bym pynurlong u VC ïa ki jingdawa, ym ïashim bynta ka JAC ha ka ‘Academic Council’

Shillong, Risaw 29

Ka Joint Action Committee (JAC) jong ka NEHU ka la rai ba nym ïatreilang bad ïashim bynta ha ka Academic Council (AC) ka ban long ha ka 31 tarik mynta u bnai kum ka dak ka jingpyrshah ïa u Vice-Chancellor (VC) ka skulbah Prof. Prabha Shankar Shukla.

Ka JAC ka sngew ban pyntip ba ka NEHU Student’s Union (NEHUSU) ka la wan shakhmat ban ïakhun na bynta ka bha ka miat jong ka skulbah bad ai khublei ruh ïa ka Meghalaya Tribal Teacher’s Association (MeTTA) na bynta ka jingkyrshan jong ka ïa ka komiti.

“Ka JAC ka la shim khia halor ka jingshim sting bad jingleh bym suitñiew jong u VC haba ïadei bad ki jingdawa ba la buh hakhmat da ki 3 kynhun ka JAC – NEHU TA, NEHUNSA bad NEHUSU kiba la slem bah mynta. Namar ka jingbym pynurlong ïa ki jingdawa, ka JAC ka la rai ban pynjur ïa ka jingïakhih pyrshah ïa u VC bad ban ïaid shakhmat da ka Non-Cooperation Movement (NCM) ka ban sdang da ka jingïalang AC ka ban wan,” la ong ka kyrwoh na ki nongïalam ka JAC.

Haba kdew ba ka shithi ai por ban weng (ïa ka jingkynnoh thung kam be-aiñ) ïa u Technical Officer/Senior Consultant (Rohit Prasad) ka la kut, ka JAC ka la ong ba namarba u VC u jied ban shah liang bad utei u ophisar, da kaba kyntait ïa ka jinglong be-aiñ bad ki jingsngew jong kiba bun, ka komiti kam don lad da kumwei pat hynrei ban ïaid shakhmat bad ka jingïakhih ka ban sdang da ka jingbym ïatreilang bad jingbym ïashim bynta haba ïadei bad ka jingpynïaid ïa ka jingïalang AC kaba 111 ka ban long ha ka 31 tarik Risaw.

Nalor ka jingdawa ban weng mardor ïa u Rohit Prasad, ka JAC ka dawa ruh ban thung mardor ïa ki Statutory Officer, u University Engineer bad Director, CDC.

Ha kajuh ka por, ka komiti ka la buh jingdawa ban shim khia ïa ka jinglong-jingman ba i-sangsot jong ka University Health Centre kumjuh ban pynmih ïa ka jingpynbna na bynta ki kam ki bym don jingïadei bad ki kam hikai.

Ka JAC ka dawa ruh ban pyllait noh ïa ki nonghikai bad ki nongtrei ‘Technical’ ban trei ïa kiwei-kiwei ki jait kam lait na ki kam lajong. Ka komiti ka pynsngew ruh ïa ka jingbym pynlong tista ïa ka ‘Convocation’ bad ka jingdkoh ha ka liang ki bor pahara hapoh ka skulbah nalor kiwei-kiwei.

“Kine ki dei ki jingdawa ba sahteng jong ki 3 tylli ki kynhun ba la ithuh da ka NEHU kaba u VC u la jied ban kyntait,” la ong ki nongïalam.

“Naba u VC um shym la burom ïa ka jingai por ban weng ïa u Rohit Prasad ne shim ka sienjam ban pynurlong ïa ki mat ba sahteng jong ki 3 tylli ki kynhun ka NEHU, ngin pynjur ïa ka jingïakhih jong ngi. Ka JAC ka la rai ban sdang da ka jingbym ïatreilang bad jingbym ïashim bynta haba ïadei bad ka jingpynïaid ïa ka jingïalang AC kaba 111,” la ong ki nongïalam ka JAC.  

Ha kajuh ka por, ki la bynrap ba yn pynlong ïa ka General Assembly jong ka JAC ha ka 31 tarik Risaw, 2023 ha Multi-use Convention Hall ha ka por 10:30 mynstep ban ïakren halor kitei ki mat haneng.

Kumta la kyrpad ïa baroh ki dkhot jong ka JAC, dkhot ka MeTTA bad Research Scholar’s Forum, NEHU ban ïa wan khnang-khnang sha ka jingïalang.

“Yn nang pynjur shuh-shuh ïa ka jingïakhih lada ym lah ban pynurlong ïa kitei ki jingdawa ha ka por ba la buh,” la ong ka JAC.