Shillong, Risaw 29
Ki kam runar pyrshah ïa ki khyllung khynnah ha kane ka Jylla kiba la jia naduh 2018 haduh 2022 ki long 2156 tylli. Kine kynthup lang ïa ki kam runar kiba pynngat ha ka aiñ Protection of Children from Sexual Offences (POCSO).
Ki jingjia kiba la buh ryntih da ka tnat pulit ki pyni ba kine ki jingjia ki ïai jia man ka por. Ki kam runar hapoh ka POCSO kiba la jia ki long 266 tylli ha u snem 2018, ha u snem 2019 ki long 219 tylli, 328 tylli ha u snem 2020, 384 tylli ha u snem 2021 bad 371 tylli ha u snem 2022.
Katkum ki jingkheiñ ïa ki kam runar pyrshah ïa ki khyllung khynnah naduh 2018 haduh 2022, ki long 385 tylli ki jia ha u snem 2018, 379 tylli ha u snem 2019, 415 tylli ha u snem 2020, 481 tylli ha u snem 202 bad 496 tylli ha u snem 2022.
Ki jingjia pyrshah ïa ki khynnah ki kynthup ruh ïa ki jingrahbor ha kaba ki don 67 tylli ki jingrahbor ha u snem 2018, 71 tylli ha u 2019, 50 tylli ha u 2020, 63 tylli ha u snem 2021 bad 89 tylli ki jingrahbor ïa ki khynnah ha u 2022. La ong ba ha une u snem 2023 ruh ki kam runar ki ïai jia ha kylleng ka Jylla tang ïa ki jingkheiñ dang lum namar hap kheiñlang baroh shisnem.
