Shillong, Risaw 29
Ka sor Shillong ka la ïoh pdiang ïa ka khusnam “City with the Best Record of Public Involve-ment in its Transport Planning” na bynta ka projek “Shared Commuter Service in East Khasi Hills (Shillong), an initiative implemented by the Sustainable Transport and Efficient Mobility Society (STEMS)”, ha ka jingïalang ba 16 jong ka Urban Mobility India Conference & Expo 2023, kaba la long naduh ka 27 tarik haduh ka 29 tarik Risaw, 2023 ha New Delhi.
U Manoj Joshi, Secretary ka tnad Housing & Urban Affairs, ka Sorkar India u la pynkup burom ïa ka STEMS ha ka Lah Sngi U Blei.
Ka Kong Isawanda Laloo, IAS, Secretary ka Sorkar Jylla bad CEO – STEMS, ha ryngkat ki dkhot ka kynhun STEMS ka la pdiang ïa ka khusnam. Kiwei-kiwei ki jaka sor kiba la ïoh pdiang ïa ki khusnam ha ki kyrdan bapher-bapher ha ka jingïalang ki kynthup ïa ka Delhi, Lucknow, Srinagar, Bhubaneswar, Kochi, bad Jabalpur.
Kane ka dei ka khusnam jingithuh ha ka sien banyngkong na bynta ka STEMS, ïa kaba la pynwandur ha u snem 2021 da ka tnad Planning, ka Sorkar Jylla.
Kane ka dei ka sienjam banyngkong eh ba ka STEMS ka la paw ha u snem 2023 hadien ka jingpyllait ïa 30 tylli ki bos skul ba la pynbiang ha ki jaka khapngiah bapher-bapher hapoh sor Shillong.
Ha ryngkat ki CCTV bad ka jingpyndonkam ïa ka GPS ban pyni ïa ka por kaba biang sha ki kmie ki kpa, man la ki bos ki don ïa ki briew kiba la pyntbit ban kitkhia bad ïa ki lynti la pynwandur hadien kiba bun ki jingïakren bad ki paidbah.
Ki tnad treikam ba ïatehlok bad ka STEMS ki kynthup ïa ka Meghalaya Transport Corporation, NIC Meghalaya bad NIC Uttarakhand, ha ryngkat ka jingsynran na ka Shillong Traffic Police bad Public Works Department (Roads).
Kum ban shu kdew ba ïa ka khusnam la ai sha ka STEMS halor ka jinglah jong ka ban pyndon bynta shit rhem ïa kito kiba don ka jingsngewkhia – ki dkhot ka imlang-sahlang, bor pynïaid skul bad ki kmie ki kpa nalor ki jingïakren bad ki tnad Sorkar kum ki bor distrik, East Khasi Hills, Shillong Traffic Police, PWD, MTC, lem bad kiwei-kiwei katba dang pyrkhat ïa katei ka bynta.
Ha ka sienjam pyrshang; ban wanrah ïa ka jingïasam ha ka jingshong bos na bynta 15 tylli ki skul ha sor Shillong, ka projek ka la ïoh lum ïa ki jingpynsngew kiba sngewtynnad bad ïoh pdiang ruh ïa ka jingïaroh na ki kmie ki bad ki khynnah.
Kane ka projek ka thmu ban pynmyntoi ïa ki nongshong shnong ka sor Shillong kiba ju pynlut por la kumno-kumno 70 minit ha ka jingdheng kali man ka sngi.
Da ka jingkiew ha ka jingpynrung kyrteng ki khynnah, ka jingwanrah ïa ki lynti bapher-bapher bad ka jingpynsaphriang jingtip halor ka projek, la khmih lynti ba ka jingpyllait ïa baroh ki bos kan sa pynduna shi kat dei ïa ka jingkhapngiah ha ki surok ha ryngkat ka jingpyntikna ïa ka leit ka wan kaba shngaiñ bad kaba bit ba biang na bynta ki khynnah.
Ka phang jong ka jingïalang ba 16 jong ka ‘Urban Mobility Conference and Expo 2023’ ka long ‘Integrated and Resilient Urban Transport’. Kane ka long katkum ka kyrwoh na ka CEO – STEMS, Kong Isawanda Laloo.
