Shillong, Risaw 29
Ki pulit ka East Jaiñtia Hills ki la ïoh kurup ïa u drok ba shongdor kumba T.1.5 klur na uwei u nongkhaïi drok na Assam ha ka Lah Sngi U Blei.
Katkum u kyrwoh khubor na u SP ka East Jaiñtia Hills, u Jagpal Singh Dhanoa, la ong ba mynta ka step, hadien ka jingïoh jingtip ba tikna, ba uwei u briew ïa uba la tip kyrteng kum u Rofique Uddin Ahmed, ïa uba la suba ba u la wanrah ïa u drok bad u lyngba kawei ka bos Night Super, ki la pynlong ïa ka jingpynap shrip.
U SP u la ong ba katei ka bos ka dei kaba don ïa u nombor AS-01-FC-7788, bad ïa ka jingpynap shrip la pynlong ha ka surokbah NH-06 hajan ka thanat Khliehriat. Haba ki pulit ki la khynra ïa kane ka bos, ki la lap ïa 20 tylli ki synduk ba don ïa u ‘powder’ rong stem. Ynda la peit bniah, la shem ba uta u ‘powder’ u dei u drok Heroin.
La ïathuh ba utei uba la shah kem u dei na ka shnong Telitakar, Katogora.
U drok uba la ïoh kurup u la don 274.23 gram bad u shongdor kumba T. 1.5 klur, la ong u Myntri Rangbah, Conrad K Sangma, ha ka rynsan X.
Na ka liang ki pulit ki la pynrung da ka jingujor pyrshah ïa u Ahmed ha thanat Khliehriat bad ka jingtohkit ka dang ïaid shakhmat ban lap ïa kiba donkti ha kane ka kam be-aiñ.
“Wat la ka jingïoh kurup drok bad ka jingshah kem ka long kaba man la ka por, ki nongkhaïi drok ki don jingthmu kaba tyngeh ban pynlong ïa ki samla jong ngi ban kylla long kyrni ha u drok. Hynrei ngi long kiba la aiti lut ïalade na ka bynta ban ïada ïa ki samla,” la ong u Conrad ha ka rynsan X. U la ai jingïaroh ruh ïa ki pulit ka East Jaiñtia Hills kiba la ïoh ban kurup ïa utei u drok ba T. 1.5 klur. U la ong ba kane ka pyni ba ki pulit ka jylla ki long kiba la aiti lut ïalade ha ka kam ban ïakhun pyrshah ïa u drok.
