Jowai, Risaw 29
Ka Jaiñtia Hills Development Society (JHDS) ryngkat ka jingïatreilang bad ka KHUBLEI Germany ka la plie paidbah sa kawei pat ka ïing baduk ba la shna bad tei kyrpang na ka bynta ka ïing ka sem jong ka Kong Smiti Phawa ba shong ba sah ha Lumpyrdi Mihmyntdu.
Shuwa ban aiti ïa kane ka ïing sha ka Kong Smiti, la plie shwa ïa ka da u Chairman ka Balang Katholik Mihmyntdu, u Bah Lamshwa Chyrmang ha ka jingdonlang u Director ka Jaiñtia Hills Development Society, Father Manbha Pakem, u Bah Denis Kurkalang, Coordinator Jaiñtia Hills Development Society, u Bah Ialammi Lyngdoh, General Secretary Balang Katholik Mihmyntdu, u Bah Fedrick Synnah ryngkat bad kiwei ki ‘riew rangbah.
Ïa kane ka ïing la shna bad pynbit pynbiang da ka Jaiñtia Hills Development Society ryngkat ka jingkyrshan kawei ka longkmie kaba na ka Ri Germany, ka Agathe Glucker.
Shuwa ban plie ïa ka ïing, ka la don ka jingïalang lyngkot ba la pynïaid da u Bah Fedrick Synnah, Chairman barim ka Balang Katholik Mihmyntdu bad la ïoh ka jingkren na u Bah Lamshwa Chyrmang bad na u Father Manbha Pakem bad ka jingkren sngewnguh na ka trai-ïing, ka Kong Smiti Phawa.
U Father Manbha Pakem ha ka jingkren u la pynpaw ka jingsngewnguh ïa baroh kiba donkti bad kyrshan ban pynshna ïa kane ka ïing kaba donkam jingïarap. U la kyntu ruh ïa ki nongïoh kynti ba kin sumar bha ïa kane ka ïing khamtam eh ban don ka jingïaieid ka jingïasngewthuh jingmut shi ïing shi sem khnang ban wanrah ïa ka longïing longsem kaba bha kaba miat bad basuk basaiñ.
Hadien ka jingkyrkhu ïa ka ïing da u Father Manbha Pakem, la ïoh ïa ka jingkren sngewnguh na ka liang ka Kur Phawa ïa kaba la kren da u Bah Sahon Phawa, President ka Kur Phawa Mihmyntdu Unit uba la pynpaw ka jingsngewnguh ïa kiba donkti ban pynshna ïa katei ka ïing.
