Shillong, Risaw 29
U Bah Amazing Kurbah u la ai jingïaroh ïa ka Wanri Pyngrope ba ka dei hok shisha ba kan ïoh ïa ka khusnam na ka Prag Cine Award na Assam namar ka jingtbit ban ak ha ka phlim ‘Ka Daw’ haba u wan peitkai ïa kane ka phlim kaba la pyni biang ha Bijou Cinema Shillong naduh ka 27 tarik mynta u bnai.
U Bah Amazing u la ong haba u peit ïa ka phlim ‘Ka Daw’ u ïohi ïa ki kali rim kiba pyndonkam ha ki juk ba mynshuwa kaba pynkynmaw ïa kane ka juk kaba mynta haba ym ïohi shuh ïa kito ki kali rim. Nangta u la ai jingïaroh ïa ka jinglah ban pyni ruh ïa ki pisa kiba rim.
U la ïaroh ruh ïa i heprit iba la nang shisha ban shimbynta ha kane ka phlim kaba i shah lehbeiñ ha ki nongri.
“Kaba kham shon jingmut ha nga ka dei ka jingtbit ka puron Wanri ban ak namar ka jingai kyrteng ‘Ka Daw’ ka lah ban dei na ka daw ïing ne dei na ka daw u shynrang ne dei na ka daw jong ka kmie ka bym lah ban pynbiang ïa ka khun” u la ong.
U la ong ba ka jingduk ka la pynlong ïa ka kmie ban sah sha ïing ki briew hynrei khlem poi pyrkhat ban shah lehbeiñ pynban ïa ka khun.
Ha kajuh ka por u la ïathuh ba u dang ak mynta tang kawei ka phlim ‘Rai-eh’ kaba la pyni ha Nongstoiñ bad Mairang. Kumjuh ruh u Bah Amazing u la ïoh ban shad ha ka music video ‘Shillong sha Dhaka’ na ka phlim ‘Dhaka Escape’ kaba la dep ringdur da u Bah Elvest Thabah bad hikai shad da u Bah Wanbet Shangpliang ryngkat u Phira Dohtdong, Nadia Syiemlieh, Sherilin Khongwar, Rishisha Mynsong bad Joinpil Pde.
