Nongstoiñ, Risaw 29
Ha ka Sngi Saitjaiñ jong ka taïew ka New Nongstoiñ Sport Social & Cultural Club, ka la ïoh ban pynkupburom ïa 15 ngut ki samla pule ka shnong New Nongstoiñ kiba la pas ïa ki eksamin ha ki kyrdan bapher bapher.
Ïa katei ka jingïalang sam khusnam la ïoh ban pynlong hapoh ka Market Complex New Nongstoiñ ha kaba u Babu D. Marbaniang uba la wan mihkhmat ha ka jaka jong u MLA ka Nongstoiñ kum u kongsan ha ryngkat ka jingïadonlang ki nongkitkam ka Youth Congress, u Sordar ka shnong New Nongstoiñ, ki samla pule ki kmie kpa bad kiwei kiwei.
Kitei 15 ngut ki samla pule kiba la shah pynkup burom ki dei ruh kiba pas bha ïa ka eksamin SSLC bad HSSLC, bad 5 ngut kiba la pyndep ïa ka Graduation bad Post Graduate bad kawei kaba la ïoh ïa ka kyrdan Ph.D kiba la ïoh pdiang ïa ki khusnam na ka Sport Club.
Haba kren kum u kongsan, u Babu D. Marbaniang u la kyntu ïa ki samla ba kin nang ïai trei shitom shuh shuh ban poi sha ki kyrdan kiba kham shajrong bad u la ai khublei kyrpang ïa kiba la ïoh pdiang ïa ki khusnam na ka jingtrei shitom bad minot ka jong ki ha ki jingpule.
