Shillong, Risaw 30
Ka New Shillong Township Development Agency ha ka Lah Sngi U Blei ka la ïoh ban aiti ïa ka jaka na ka bynta ban tei ïa ka Permanent Campus jong ka National Law University (NLU) bad ka Meghalaya State Judicial Academy ha ka shnong Mawpdang, Mawkhanu.
Ïa ka jingaiti ïa kane ka jaka la pynïaid shakhmat ha ka jingïalang kaba long ha Mawpdang, Mawkhanu, ha kaba la aiti da u Myntri Rangbah ka Jylla u Conrad K Sangma sha u Chief Justice ka Meghalaya High Court u Sanjib Banerjee uba long ruh u Chancellor ka National Law University.
Ïa kane ka jingaiti ïa ka jaka la sakhi lang ruh da ka Myntri ka tnat Aiñ ka jylla ka Kong Ampareen Lyngdoh, u Myntri ka tnat Pule-Dangle u Rakkam A Sangma, ki Judge ka High Court bad Vice Chancellor ka National Law University Prof. Indrahit Dube, u Secretary ka tnat aiñ Bah CV Diengdoh bad Member Secretary ka New Shillong Township Development Agency Bah E Kharmalki.
Haba ai jingkren ha ka jingïalang, u Myntri Rangbah ka Jylla, Conrad K Sangma u la ong ba ka Sorkar Jylla ka la long shai kdar halor ki mat jong ka na ka bynta ka jylla bad ong ruh ba kumba long kiwei pat ki Ri kiba la sdang roi, ka Jylla ruh ka la jam shakhmat ban mih na ka ïoh ka kot barit sha ka jingpynthymmai ha ka ïoh ka kot.
“Ka jingpynmih ne thaw thymmai ban kyntiew ïa ka roi ka par ka shong eh ha ka jingdon ki briew ba tbit ban treikam bad kumta ka long kaba donkam ban sdang na kano-kano ka kam bad namarkata, ka kpait-saiñ-kam (policy) jong ngi ka la ïaid shakhmat ha kaban pynthikna ba ngi kynshew bha ha ka liang ka jingdon ki nongshong shnong ba tbit treikam kaba ngi ngeit ba ki dei ki lawei jong ka Jylla,” la ong u Conrad.
Shuh shuh u Myntri Rangbah u la ong ba ka India ka dei ka Ri ki samla, bad man ki samla ki dei ban noh synñiang ha ka lynti kaba dei sha ka jingkiew irat jong ka Ri bad bynrap ruh ba ki samla ki donkam ban ïoh pat ïa ki rynsan kiba paka ba kin long ki nongshong shnong kiba lah ban noh synñiang.
Katba na ka liang u Chief Justice Sanjib Banerjee haba ai jingkren u la ong, “Ngi kwah ba kane ka skul bah kan dei ka jaka pule kaba ngin ïasam bad phi ïa ki atiar bad ki rukom treikam,” u la ong haba kyrmen ba kane ka skul bah hadien habud, kan nang ïohi ïa bun ki samla pule napoh ka Jylla.
U Chief Justice u la kyntu ruh ïa baroh ba kin kyrshan ïa kane ka jaka pule ba kan kiew kum ka National Law University khnang ba kan long ruh ka jaka pule kaba lah ban sngew sarong hakhmat ka pyrthei.
