Shillong, Risaw 30
Ka Jylla ka dang hap thied bording ilektrik na ki kompani namar ka jingduna ban pynmih bording bad ka dor kaba thied na ka National Thermal Power Corporation (NTPC) ka long T.6 tyngka shi unit.
Haba ïakren bad u Myntri ka tnat Bording ka Jylla, u A.T Mondal u la ong ba ka Jylla ka thied bording na ka NTPC kumba 53 mega watt ha ka dor kaba long T.6 tyngka shi unit.
U Mondal u la ong ba kham mynshwa ka Jylla kam shym la thied ïa ka bording na ka NTPC namar ka jingrem palat ka dor, hynrei mynta la hap ban thied namarba ka dor ka la ïajan bad ka dor ha ïew.
U la ong ba nalor ka jingthied bording na ka NTPC, ka Jylla ka thied ruh na ka OTPC bad ka NEEPCO.
Kane ka jingthied bording ka Jylla na kitei ki kompani ka Sorkar Pdeng ka dei namar ka jingduna palat ka bording kaba pynmih da ka Jylla.
Ka Meghalaya ka duna palat ka jingpynmih bording namarba ki don tang khyndiat tylli ki projek pynmih bording.
Ki don ruh ki projek kiba lah ban pynmih bording tang khyndiat ha ki aïom bym hap slap khamtam ha ka por synrai, tlang bad pyrem.
