Shillong, Risaw 30
U General Secretary ka United Democratic Party (UDP) Bah Jemino Mawthoh, u la ong ba ka jingïakren ban ïatreilang hapdeng ka National People’s Party (NPP) bad ka United Democratic Party (UDP) ha ka ilekson Member of Parliament (MP) kam don satia, hynrei kine ar tylli ki seng kin sei ïa la u jong u kyrtong ban ïakhun ïa katei ka ilekshon.
U Bah Jemino u la ong ba ka seng hi kan don ka jingïakren tang bad ka Hills State People’s Democratic Party (HSPDP) namar ba ka dei ka seng riewlum kaba la slem bha kaba ka seng UDP ka don ka jingïadei bad ka jingïalong paralok naduh ki snem kiba la dep bad kumjuh ha ka samoi treikam kaba dang shu dep ruh kitei ar tylli ki seng ki la ïatreilang hapoh ka lama jong ka Regional Democratic Alliance (RDA) bad haduh mynta ruh kine ar tylli seng ki dang ïadonlang hi hapoh ka RDA.
“Kum kata kam don eiei ka jingïakren ha kaba ïadei bad ka NPP, hynrei na ka liang ka NPP ruh ka la pyrkhat hi ban ïaid shakhmat la ka jong, ngi na ka liang jong ka seng kaei kaba ngi hap ban ïakren ka long tang bad ka HSPDP namar bad ka HSPDP kaba dei kawei na ki seng riewlum ha kane ka jylla jong ngi kaba la don la slem bha, ha kaba ngi la don ka jingïadei, ka jingïajan bad ka jingïalong paralok kaba la slem bah naduh ki snem kiba la leit noh ruh bad ha kane ka samoi treikam kaba la leit noh, ngi don ryngkat bad ka HSPDP”, la ong u Bah Jemino.
Shuh shuh u Bah Jemino u la ong ba u khmih lynti ba lada don ki seng riewlum kiba kwah ban ïasnoh kti lang bad ka RDA, ka RDA ka long kaba jynsur mynsiem namar ba ka RDA ka kwah ban don ka jingïatylli hapoh kane ka jaitbynriew.
“Ngi kwah ban don kata ka jingïatylli ha kane ka jaitbynriew jong ngi, ngi kwah ba kan don ka jingïatylli jong kine ki seng riewlum ki jong ngi khnang ba ngin lah ban sei ïa ka bor jong ki seng riewlum kaba khlaiñ tam eh hapoh ka jylla, kata ka dei ka thong jong ngi naduh mynshwa”, la ong biang u Bah Jemino.
U Bah Jemino u la ong ba naduh ki por ba la leit ruh kum ka seng ka kner ïa la ki kti kum ka jingkyrpad ïa kiwei kiwei ki seng riewlum ba lada ki sngewïahap kin wan ban ïasnoh kti lang bad ka RDA namar ba ka jingïatylli ka dei ka bor kaba khlaiñ.
U Bah Jemino u la ïathuh ruh ba ka jingïakren hapdeng ka UDP bad ka Voice of the People Party (VPP) ban ïatreilang ban pynïeng da uwei u kyrtong haduh mynta kam pat don satia kano-kano ka jingïakren.
“Kum ka jaitbynriew ngi don kijuh ki mat kiba ktah bad kaba kongsan ïa ngi ka long ba kumno ba ngin wanrah ïa kata ka rukom pyrkhat kaba ngin long lang kawei, ka jingïatylli mlon”, la bynrap shuh u Bah Jemino.
