Shillong, Risaw 30
Ki nongïalam bad ki dkhot jong ka Hynñiewtrep Indigenous Territorial Organisation (HITO) ki la mih noh baroh na kane ka seng bad ha kajuh ka por ban khylliap noh ïa ka lama jong ka seng ha Ri-Bhoi District baroh kawei.
Kane ka jingmih noh jong baroh ki dkhot bad khylliap lama ïa ka HITO ha Ri-Bhoi ka long halor ka jingkynnoh jong ka jingleh donbor shaba palat jong u President ka HITO Sengkmie, Bah Donbok Dkhar.
Ha kaba ïadei bad kane ka jingmih noh jong baroh ki dkhot bad nongïalam ka HITO ha Ri-Bhoi la pynbna da u Vice President ka HITO Ri-Bhoi Bah Elvis Kyrsian bad u Secretary Bah Kenny Nongrum.
Na ka liang kine nongïalam bad dkhot ka HITO Ri-Bhoi ki la pyntip ba ka jingmih bad khylliap noh ïa ka lama ka long kum ka jingpyrshah kaba jur halor ka jingleh donbor jong u President ka Sengkmie u Bah Donbok Dkhar uba la pynmih ka jingpynbna ha ka rynsan Social Media Group jong ka seng ba u la weng kam ïa u President bad Working President ka HITO Ri-Bhoi District.
Na ka liang kitei ki nongïalam ba la mih noh na ka seng ki la ong, “Ngim lah ban pdiang ïa ki rai shimet u President Sengkmie khlem da tip lang baroh ki dkhot ka Ri-Bhoi. Kumta kum ka jingïatylli bad shaniah ha la ki nongïalam ka district ngi la shim lang ka rai ban mih noh baroh ki nongkitkam ka district bad ki area kum ki dkhot ka HITO bad ban bteng ïa ki kam paidbah lyngba ka Ri-Bhoi Youth Welfare Organization kaba la seng naduh u snem 2017.”
Kine ki nongïalam ki la ong, “Ngin shakri paidbah noh ha la ka dong ka thaiñ Ri-Bhoi shwa ban lait ka khim ki jingshakri,” la ong u Bah Kenny Nongrum.
