Shillong, Risaw 30
Ka Khasi Students’ Union, Barak Valley Circle kum shi bynta ban ithuh-ithaw ïa ki samla pule kiba dang shu wan thymmai na ka bynta ban bteng ïa ka jingpule, ha ka Sngi Saitjaiñ jong ka taïew ba la dep ka la pynlong ïa ka prokram sam khusnam bad kumjuh ka jingpdiang burom ïa ki samla Khasi kiba sah ha Silchar, Assam.
Ha kane ka sngi, ka seng ka la pynkup burom ïa ki 45 ngut ki samla kiba la pas bha kiba wan na kylleng ka them Barak Valley.
Ha kane ka sngi la sakhi lang da u President ka KSU Sengkmie u Samla Lambokstarwell Marngar ryngkat ka jingsynran lang jong u Assistant Secretary ka KSU u samla Rueben Najiar bad ki dkhot jong ka Central Executive Committee, u Chairman ka Khasi Jaiñtia Village Development Council Bah Sebastian Pakyntieñ, u President jong ka Barak Valley Khasi Jaiñtia Welfare Organisation Bah Charles Rymbai, u General Secretary jong ka Barak Valley Khasi Jaiñtia Welfare Organisation Bah Wanbor Pdang bad kiwei kiwei.
La pynphuh pynphieng ïa kane ka jingïalang da ki jingshad tynrai bad la pynlong ruh ïa ka jingïakop Master Freshers bad Miss Freshers ha kaba ïa ka nam jop la ïoh rah da u Samla Hamjngai Bareh kum u Mr. Freshers bad ka samla Manisha Pohdweng kum ka Miss Freshers jong u snem 2023.
