Shillong, Risaw 30
Kawei ka jingthoh lane message kaba la wan ha ki Mobile Phone ka la pynkyndit ïa kiba bun ki briew hapoh ka jylla ha ka Lah Sngi U Blei namar ka la wan ryngkat bad ka jingsawa kaba jam.
Kane ka jingthoh ka la wan kum ka kynja ‘siren’ bad ka jingthoh ka long ha ka ktien English bad Hindi.
Ha kane ka jingthoh kaba la wan lyngba ka tnad Telecommunication ka Sorkar Pdeng, la batai ba ka dei tang kum ka khubor ba pyrshang kum shi bynta ban pynlong ïa ki briew ba kin pynkhreh na ka bynta kino-kino ki jingwan lynshop.
Kane ka jingphah khubor ryngkat ka jingsawa ka dei kaba la wan na ka National Disaster Management Authority.
Wat la ka la don ka jingpyntip lypa ba kan don kum katei ka jingphah khubor, hynrei kiba bun ki khlem poi pyrkhat satia ba ka Mobile Phone kan shu pah ‘Siren’ haduh ar ne lai sien.
