Jowai, Risaw:
Ka Meghalaya Bharat Scouts and Guides ka la thung ïa u Deputy Commissioner ka West Jaiñtia Hills District, u Bah B.S. Sohliya kum u President ka Bharat Scouts and Guides jong ka District ha ka jingïalang kaba la long hapoh ka kamra jong u ha ka Sngi Thohdieng.
Ïa kane ka jingïalang la khot pynlong da u Bah W. Lyngdoh, State Secretary ka Meghalaya Bharat Scouts and Guides ha ka jingdonlang ka Kong A.P. Syiem, District School Education Officer & District Chief Commissioner kaba la ai ka jingkren pdiang sngewbha, ka Kong Saramai Tariang, Vice President ka Meghalaya Bharat Scouts and Guides, West Jaiñtia Hills District kaba la pynïaid ïa ka jingïalang ha ryngkat ka jingdon lang ki dkhot ba la rim. Ha ka jingkren u Deputy Commissioner Bah Sohliya u la pynpaw ka jingsngewnguh sngewburom ban ïoh ïa ka lad ban long ka bynta bad ka Meghalaya Bharat Scouts and Guides.
Nalor kata, u la ai khublei ruh ïa ki dkhot napoh ka District halor ka jingpdiang sngewbha ka jong ki shapoh ka kynhun bad pyntikna ruh ha ki halor ka jingkyrshan bad jingïarap bapura na ka liang ka jong u ha baroh ki jingtreikam ki jong ka.
