Shillong, Risaw 31
Ka Joint Action Committee jong ki seng ba don ha ka skulbah North Eastern Hill University (NEHU) ba kynthup ïa ka NEHUTA, ka NEHUSU bad ka NEHUNTA ha ka Sngi Ba-ar ka la tur sha shlem treikam jong u Rohit Prasad bad bthah ruh ba u dei ban mih noh shi syndon na ka kamra treikam.
La ïohi ba ki dkhot ka JAC da ki phew ngut ki la tur ha kane ka sngi da kawei beit ka jingmut ba u Rohit Prasad u dei ban mih noh shi syndon na kane ka skulbah. Ki dkhot haba ki la poi sha ka kamra treikam jong u, ki la kyndar ïa ka jingkhang bad pyrta ba u dei ban mih noh shi syndon bad hadien katto katne, u Rohit u la hap ban mih noh.
Kane ka jingleit kyndang jong ka JAC ïa u Rohit Prasad na ka kamra treikam ka jong u, ka long halor ka jingkynnoh ba la shu thung kam beaiñ kum u Technical Officer/ Senior Consultant da u Vice Chancellor, u Prabha Shankar Shukla khlem da pynmih kano-kano ka jingpynbna lane ka advertisement, hynrei la shu leh hi beit da u VC bad ïa ka interview ruh la leh tang da kaba shu video call.
Ka jingshim hi ha la ka jong ka kti ban leit kyndang ïa u Prasad ka long hadien ba na ka liang jong u VC u la leh bym suitñiew ïa ka jingdawa jong ka JAC ka la dep ban dawa na u Vice Chancellor ka NEHU, ba u dei ban weng kam noh ïa u Rohit Prasad da kaba aipor haduh ka 26 tarik mynta u bnai.
Hadien ba ka JAC ka la lah ban phah mih ïa u Rohit Prasad shabar ka kamra treikam ka jong u, ka la pan ruh ïa u shabi jong ka kamra, hynrei ha kaba nyngkong u la kyntait ban ai da kaba ai daw ba um don satia.
Hynrei na ka liang ki nongïalam bad dkhot ka JAC kim shym la sngap halor kane bad ki la ong ba u dei ban ai beit ïa u shabi bad hadien ka jingdawa, u Rohit um banse ban leit shim na ka jaka kaba u sah ban aiti sha ka JAC. Ïa u Rohit Prasad ha kane ka sngi la hap ban synran lang beit da ki nongap pahara jong ka NEHU ban peit ba kan nym don kano-kano ka jingjia namar ka jingtur paidbah jong ka JAC.
Hadien ba la ïoh ïa u shabi, na ka liang jong ka JAC ka la leit ban khang tala noh syndon ïa ka kamra treikam.
Ha kaba ïadei bad kane, haba la pyrshang ban ïakren bad pan jingshai, na ka liang jong u Vice Chancellor ka NEHU um shym la treh ban kren eiei bad ha kaba u la ong ba halor kine kiei-kiei baroh un sa kren ha kine ki khyndiat por ban wan.
