Shillong, Risaw 31
U Myntri ba khmih ïa ka tnat PHE ka Jylla u Marcuise Marak u la ong ba ka um kaba la sam da ka tnat sha ki paidbah ka sor Shillong ka long kaba khuid bad kaba shngaiñ ban bam bad dih.
“Ka um ba la sam da ka tnat kam don jingma satia ïa ka koit ka khiah ki paidbah hynrei ka long kaba shngaiñ ban pyndonkam ha kaba bam bad dih,” la pyntikna u Myntri ka tnat PHE haba kren sha ki lad pathai khubor ha ka Sngi Ba-ar.
U Myntri u la ïathuh ba ha shwa ban sam ïa ka umbam umdih, la dep ban leh ïa ka jingsumar na ka jingpynkhuid ha Mawphlang Treatment Plant, ha kaba ïa ka um la ju peit bniah ruh man la ka sngi khnang ban pyntikna ba kan dei kaba khuid bad pyllait na kino-kino ki jingma ïa ki paidbah kiba pyndonkam haba dih bad bam.
Kum ki paid nongshong shnong ka Sor Shillong kim dei ban don kano-kano ka jingsngew khohñioh haba pyndonkam ïa ka umbam umdih ba la sam da ka PHE namar ka long ka um kaba khuid bad kaba shngaiñ.
Ha kaba ïadei bad ka um nongmuna kaba la wanrah bad dep phah peit bniah da ka seng FKJGP dang ha u bnai ba la dep, ha kaba la lap ba kam long satia kaba shngaiñ bad buh jingma ïa ka koit ka khiah jong ki paidbah, u Myntri u la ong, “Ngam tip nangno ka FKJGP ka la leit ban shim ïa ka nongmuna jong ka um ban phah peit bniah, namar ka um ba sam da ka PHE ka long kaba shngaiñ ban dih”.
U la ong, “Ïa ka um ba la sam da ka PHE na Mawphlang, la pynpoi ha ka top um kaba don ha 6 Mer shiteng bad nangne la pynpoi pat sa ha ka top um kaba don ha 4 Mer bad nangne ngi sam pat sha ka top um jong ka Municipal. Kumta ka um ba la sam da ka tnat PHE ka long kaba khuid bad kaba shngaiñ namar na ka por sha ka por la ju peit bad khmih bniah ïa ki top um ban pynthikna ba kan nym long jaboh bad pynjakhlia ïa ka um dih.”
