Shillong, Risaw 31
Ka jingïalang ka Kynhun Myntri ha ka Sngi Ba-ar ka la ai jingmynjur ban pynthymmai ne amendment ïa ka Meghalaya Excise Amendment Rules, 2021 na ka bynta ban pynïabynta ïa ki ‘brand’ ban pyntikna ban kyntiew ïa ka jingïoh lum khajna bynrap da ka tnat sa kumba T.50 klur.
Haba kren sha ki lad pathai khubor hadien ba la wai ka jingïalang, u Myntri Sorkar u Marcuise N Marak u la ong, “Ki don shibun ki brand hapoh ka jylla ka jong ngi bad kumta ngi la pynïabynta thymmai na ka bynta ban kham heh ka jinglum khajna bad mynta ngin don noh tang 5 jait ha ka jaka jong ki hynriew jait.”
Haba pynpaw ba la khmih lynti ba ka jinglum khajna kan kiew da 15%, u Myntri u la ong ba ka jylla nalor ka khajna ba ka ju lum, kan ïoh bynrap sa kumba T.50 klur manla ka snem bad kumba ka long mynta, ka jinglum khajna ha ka shisnem ka long kumba T.350 klur eiei.
Haba kylli, u Commissioner & Secretary ka tnat Excise u Sanjay Goyal u la ong ba ka jinglum khajna jong ka tnat ha kine ki san snem kiba la leit ka la long kyllum kumba T.1200 klur eiei.
“Ha shwa jong ka khlam Covid, ka jinglum khajna ka long tang kumba T.200 klur bad ha kine ki 4 bad 5 snem, ka la don ka jingkiew ha ka jingïoh lum khajna, kumta lada shim na kane, ka lah ban poi kumba T.1200 klur, ïa kaba ngi hap ban pyntikna na ki jingthoh ba ngi don,” la ong u Goyal.
