Shillong, Risaw 31
Ka Sorkar Jylla shen kan sa ïaleh ban thung kam bad ban pyndap noh ïa 2500 tylli ki kam ba lait bad thylli hapoh ka tnat Pulit.
Haba kren sha ki lad pathai khubor hadien ba la wai ka jingïalang ka kynhun Myntri ha ka Sngi Ba-ar, u Myntri Sorkar u Marcuise N Marak u la ong, “Ngi la dep ban ai jingmynjur ïa ka revised uniform guidelines ban thung kam ïa ki pulit hapoh ka tnat Meghalaya Police.”
Haba pyntip kham bniah halor kane ka phang, u Principal Secretary ka tnat Personnel Bah CVD Diengdoh u la ong ba kane ka dei ka jingthung kam ha baroh ki kyrdan jong ki pulit naduh ki Sub Inspector, Armed Branch Constable bad Unarmed Branch Constable kynthup ki Fireman bad MPRO Operator.
“Ngi la ïohi ha ki snem ba la leit ba kine ki jingthung kam ki shimpor bha ban dep namar kiba bun ki kyndon, ta ka daw ngi la pyrshang ban pynbeit ryntih ïa ki kyndon khnang ba ngin lah pyntikna ba ka jingthung kam kan dei kaba pyndep ha ka rukom kaba janai, kaba shai bad kaba kloi,” u la ong.
Shuh shuh u Bah Diengdoh u la ong, “Hadien ba la dep ban pynkylla ïa ki kyndon, ngin sa pynmih jingpynbna bad hadien ngin sa pynbna lait kam ïa kine ki kam kiba lait thylli bad ka Central Recruitment Board kan sa pyntikna ba kan pynlong bad pyndep noh kloi ïa ka eksamin rung kam.”
Ha kawei pat ka liang, ka Kynhun Myntri ka la mynjur ruh ïa ka Rules ban pynlong ïa ka Departmental Examination, 2023 ïa ki ophisar jong ka Indian Police Services (IPS).
“Ha ka jingshisha ïa ka Departmental Examination ïa ki ophisar IPS la ju pynlong da ka UPSC ban pynkiew kyrdan, hynrei mynta yn sa pynlong noh da ka MPSC hangne hapoh ka Jylla,” la ong u Marcuise.
