Jowai, Risaw 31
Ka Hynñiewtrep Border Disputed Redressal Forum (HBDRF) ha ka Sngi Ba-ar ka la leit ban ujor sha u Deputy Commission ka West Jaiñtia Hills District halor ki jingeh bad jingshah pynshitom ki paid Khasi Pnar ba shong ba sah ha Block-1.
Haba kren sha ki lad pathai khubor hadien ka jingïakynduh, u Chairman ka HBDRF u Bah Chandame Sungoh u la ong ba la ujor halor ki 4 tylli ki mat, kita ki long ka jingpyntieng pynsmiej ïa ka hok jong ki Khasi Pnar ba shong ba sah ha Block-I ha ka jingthmu jong ka jingpynbeit pud hapdeng ka Meghalaya bad Assam, ka jingkhanglad ban pynlong ïa ka jingïalang paidbah, ka jingpakhang lynti ban leit bad wan sha Meghalaya bad ka jingkhang ban die ïa ki mar ki mata.
Ka mat kaba kongsan ba ka sorkar kan shim ban pynbeit kan dei ïa u pud u sam bad kane ka jingpynbeit kan dei lyngba ka mon jong u paidbah. Hynrei u la kynnoh ba kumba long mynta, ki Karbi ki pyrshang ban leh da ka buit thok ban khroh ban kjor bad ban pyntieng pynsmiej ïa ki Khasi Pnar khnang ba kin ym nud ban pynpaw ïa la ka hok lane ïa ka jingkwah jingthrang jong ki ban don shapoh Meghalaya.
Ha kaba ïadei bad ka jingkhang lad ban pynlong ïa ki jingïalang paidbah, une u nongïalam ka HBDRF, u la ong ba ki la ïoh ïa ka jingtip kaba tikna ba ki Karbi ki la khang pyrshah ïa ki Khasi Pnar ba shong ba sah ha kine ki thaiñ ban pynlong kino-kino ki jingïalang paidbah khamtam eh lada kin dei ki jingïalang haba ïadei bad u pud u sam.
Ha kaba ïadei bad ka jingpakhang lynti ban leit ban wan sha Meghalaya, u Bah Sungoh u la kynnoh ba haduh mynta mynne khamtam eh na ka liang ki Karbi ki dang khang lad beit ïa ki Khasi Pnar ban leit ban wan sha Meghalaya khamtam eh sha ka thaiñ Khanduli, Lapangap naba ki Khasi Pnar ba shong ba sah ha ka Raid Nongrong bad Raid Labang kim lah ban leit suk wan suk sha Meghalaya.
Ha kaba ïadei bad ka jingkhang ban die ïa ki mar ki mata, u Bah Chandame u la ong, kane ruh ka la ktah jur bha ha ki thaiñ Khanduli-Lapangap naba ki Khasi Pnar ba shong ba sah ha Raid Nongjrong bad Raid Labang kim ïoh ban leit die ïa ki mar ki mata sha ki ïew kiba don shapoh Meghalaya kum sha Khanduli, Namdong, Wahïajer bad kiwei kiwei de ki jaka.
Une u nongïalam ka HBDRF u la kyntu ïa ka bor District jong ka West Jaiñtia Hills District ba kan shim khia ban ïakren bad pynsngew sha ki bor pynïaid District jong ka West Karbi Anglong ïa ki jingeh jong ki paid Khasi Pnar kiba shong ba sah sha Labang Nangphyllut Pangam Raliang.
