Shillong, Risaw 31
Ka Hynñiewtrep National Youth Front (HNYF) Sengkmie ha ryngkat bad ki dkhot jong ka HNYF East Khasi Hills District hadien ka jingshah kem jong u President jong ka HNYF East Khasi Hills District, u Bah Bless Dkhar ki la pynpaw ba ki dap da ka jingsngewlehraiñ halor katei jingjia bad kum ka seng kam don kano-kano ka jingbah-khlieh namar kam dei ka kam jong ka seng, hynrei ka dei ka kam jong u shimet.
Kum ban shu kdew hangne ha kine ki khyndiat sngi kiba la dep, kawei ka lad pathai khubor na ka jylla ka la pyllait paidbah ïa kawei ka sur kren lyngba ka ‘phone’ kaba la rekod hapdeng u President ka HNYF East Khasi Hills District, u Bah Bless Dkhar bad uwei u briew ïa uba la buhrieh kyrteng. Ha kata ka jingïakren ba la rekod, la ïohsngew ba utei u President ka HNYF u la dawa pisa T. 1,500 na kawei ka trok ban pyllait ïa ki ban ïaid lyngba ka jingkieng Damsite haduh ha Mawlai bad sha kiwei kiwei ki jaka.
Na ka liang ki pulit ka East Khasi Hills ki la kem noh ïa utei u President ha ka 30 tarik u Risaw, 2023 ha ka por 9 baje mynmiet bad ka jingtohkit halor kane ka jingshah kynnoh jong utei u President ka dang ïaid shakhmat.
Haba kren sha ki lad pathai khubor, u Bah Sanbor Rapsang uba dei u Discipline Secretary ka Sengkmie, u la ong ba ka seng ka kwah ban pynshai sha ki paidbah ba ka jingleh jong u Bah Bless Dkhar kam don jingïadei eiei bad ka seng HNYF, bad ka seng ka khlem ai bor satia ïano-ïano ruh u dkhot ban leh ïa kum kitei ki jait kam.
“Kum ka seng hi ka kwah ban pynshai paidbah ïa ki khun ka Bri u Hynñiewtrep ba ïa kine kiei-kiei kiba une u Bah Bless Dkhar u leh kam don jingïadei eiei bad ka seng HNYF, bad ka seng HNYF ka khlem aibor ïa uno-uno u dkhot ban leh ïa kine ki jait kam”, la ong u Bah Rapsang.
Shuh shuh u Bah Rapsang u la maham tyngeh ruh ïa kiwei pat ki para dkhot ba kim bit ban leh ïa kano-kano ka kam khlem da tip da ki nongïalam jong ka sengkmie. U la ong ruh ba kum ka HNYF kaba la shakri ïa u paidbah la kumba 28 snem eiei kam ju don satia kum kine ki jingjia.
U Bah Rapsang u la buh jingkylli ruh ïa ka tnad pulit ba u Bah Bless u dei uei ban pyllait ïa kita ki trok na jingkieng Damsite ha kaba ha katei ka jaka ruh u pulit u la don bad ha ka jingshisha ki dei ma ki nyngkong eh kiba dei ban peit ïa ka rukom long rukom man namar lada ka biang ka rukom treikam jong ki pulit, yn nym don lad satia mano-mano ban shim kabu lada dei u Bah Bless ne kiwei kiwei ruh kiba leh ïa kum kitei ki jait kam.
Kumta na ka liang ka sengkmie ruh ka la rai ba kan sa shong da ka jingïalang kaba kyrkieh ban shim ïa ki rai bad ki sienjam ha kaba ïadei bad ka jingleh jong u Bah Bless. Ha kaba ïadei bad ka jingbat kam jong u Bah Bless kum u President, ka HNYF East Khasi Hills District, ka seng kan weng kam shwa shipor.
“Katba ym pat don hi u President, mynta ïa kane ka kam yn shim shwa ka jingkitkhlieh na ka bynta ki mat bapher bapher jong ka Jaitbynriew da u Assistant Secretary bad u Vice President bad kiwei kiwei kiba ïatreilang bad ka kynhun jong ka East Khasi Hills”, la ong u Bah Rapsang.
Katkum ki tyllong khubor la ïathuh ba ïa utei u President ba la shah kem, ki pulit ki la registar da ka Suo Moto Case pyrshah ïa u namar ka jingpynkheiñ ïa ka hukum jong ka ïingbishar High Court da kaba lum pisa be-aiñ.
