Shillong, Naiwieng 01
U Bah Sandondor Ryntathiang ha ka janmiet jong ka 1 tarik u Naiwieng, 2023 u la pynbna sha ki lad pathai khubor ba u la mih noh na ka seng Hill State People’s Democratic Party (HSPDP) hadien ba u bat ïa ka kam kum u President jong ka Youth Wing CEC jong ka seng ha ryngkat katto-katne ngut ki dkhot na ki Jylli (Circle) bapher-bapher kiba kynthup na Jaiñtia Hills, Ri Bhoi District bad Sohïong Circle.
U Bah Sandondor u la pyntip ruh ba ïa ka shithi ïehnoh kam jong u la phah ha katei kajuh ka sngi sha u President ka HSPDP, u Bah KP Pangniang.
U Bah Sandondor u la ïathuh ba kine baroh kiba la rai ban mih noh na ka seng ki dei kiba la don slem bha hapoh ka seng. U la bat ïa ka kam President jong ka Youth Wing CEC ka dei naduh u snem 2019 bad naduh u snem 2014 u la don hapoh ka seng.
Haba pyrshang ban kylli ïa ka daw jong ka jingïehnoh kam jong u na ka seng HSPDP, na ka liang u Bah Ryntathiang u la ong ba kim don daw eiei bad ka HSPDP hynrei ka jingmih jong ki ka long tang kawei bad kata ka long ba kan buh jingeh ïa ki kum ki nongïalam ban leit pynsngewthuh ïa u paidbah lada ki don ha ka seng HSPDP.
“Ngim don daw eiei ïa ka seng lane ki nongïalam jong ka, ka dei ka seng kaba skhem ka nongrim hynrei ngi ïohi ban pynkhlaiñ bad pynskhem ïa kane ka nongrim da kaba ngi leit sha u paidbah kan eh than ïa ngi.
U Bah Sandondor u la ong ba ka seng HSPDP watla ka don ïa ka nongrim kaba skhem hynrei haba peit pat ïa ka jingïalam jong ka, ka kham tlot shibun eh bad ka jingeh jong ki kum ki khun samla ka long ba watla ki don ha ka seng kaba don ïa ka nongrim hynrei ban pynkhlaiñ ïa ka seng lyngba ki nongrim jong ka seng kumba long mynta ha kane ka jingïalam kaba mynta, ka long kaba eh than.
“Ban shu don tang ha ka nongrim, lada ngim lah ban trei, ka shem shitom ïa ngi bad kan shu kut noh tang hangta hi”, la ong u Bah Sandondor.
U Bah Sandondor u la ïathuh ba ma u ha ryngkat bad kitei ki dkhot kiba la mih na ka seng ki la shim ruh ïa ka rai bad kata ka long ba kin leit ban pynïasnoh beit bad ka Voice of the People Party(VPP) namar katei ka seng ka don ïa ka nongrim kaba skhem kum ka HSPDP hi. Kaba kham kyrpang shuh ka dei ka jingdon ïa ka jingtreilang bad ka jingïalam hapoh katei ka seng ka long kaba khlaiñ bad la ïohi ruh ba ha kylleng ka Bri u Hynñiewtrep bad ha ka jylla hi baroh kawei, ki paidbah ki phai khmat sha ka VPP.
“Ngi ruh ngin dang pynkhlaiñ shuh shuh da kaba ngin leit ban pynïasnoh ban trei na ka bynta ban saiñdur saiñdar thymmai ïa ka saiñ pyrthei ha kane ka Jaidbynriew jong ngi bad ha ka jylla hi baroh kawei”, la ong u Bah Sandondor.
