Shillong, Naiwieng 01
U Symbud Myntri Rangbah ka jylla, Bah Prestone Tynsong ha ka Sngi Balang u la ong ba katba dang don ki District Council ka jaidbynriew ruh kan nang ïai neh, hynrei lada dawa pynduh noh ïa ka, ka jaidbynriew kan hap syndon sha riat.
U Bah Prestone u la pynpaw ïa kane haba ai jingkren kum u kongsan ha ka jingrakhe ïa ka lyngkhuh sngi ïap kaba 64 jong u Kpa ka Sixth Schedule u Rev. JJM Nichols Roy kaba la pynlong da ka Rev. JJM Nichols Roy Memorial Committee, ka JJM Nichols Roy College bad ka Khasi Hills Autonomous District Council.
U Bah Prestone haba ai jingkren u la ong, “Ha ki snem kiba la leit la don uwei u MLA uba la wanrah ïa ka Motion hapoh ka ïingdorbar thawaiñ ka jylla ba kwah ban pynduh noh ïa ka jingtreikam jong ki Autonomous District Council bad ban pyntreikam noh da ka Article 371. Kane ka dei kaba ma bad shyrkhei bha.
Ngam kwah ban batai eiei shaphang une u MLA hynrei sa wad jingtip hi ma phi, lada phim lap, leit ha Assembly Secretariat phin ïoh ïa kato ka bui (register) kumba ka long”.
Haba pynksan ïa ka jingdon ki District Council, u Bah Prestone u la ong, ba ka district council ka long kum ka stieh namar ha ka por ba la don ka jingkhihwin bad thmu ban pynkylla aiñ noh ïa ka Citizenship Amendment Bill (CAB) sha ka Citizenship Amendment Act (CAA) la lah ban pyllait noh ïa ka Meghalaya namar ka hap hapoh ka Khyrnit ba Hynriew ne Sixth Schedule.
U Bah Prestone u la pynkynmaw ruh ba “Ki don ki rangbah kiba ong ba ka jaidbynriew ka don ha tmier ka riat bad sa tang lano ka la hap sha riat. Nga ong hangno kata ka riat, ka riat aïu kata, katba dang don ka District Council ngin ïai neh, lada wan ka 371 kata keiñ kan dei ha tmier jong ka riat bad ngi lah ruh ban duh noh.”
Ha kawei pat ka liang, u Bah Prestone u la pynshlur ïa ki samla ba lada ki ieid hok ïa ka jaidbynriew ki dei ban ïakhun da ka ilekshon MDC ym ïa ka ilekshon MLA.
“Ha nga hi, nga pynshlur ban ym long MLA hynrei ban long MDC, bha ba long MDC ban ïa kaba long MLA bad lada ieid hok ïa ka jaidbynriew kata kaba donkam,” u la ong bad bynrap ba dang khyndiat tylli ki snem la mynjur ïa ka Land Bill kaba la pynkupbor da ka riti synshar jong ka ri India, 50 snem duna ym don ïa ka Land Bill bad ong ba kam dei ka sorkar kaba long trai ïa ka khyndew ka shyiap, hynrei dei ka District Council kaba ri sumar ïa ki jaka ki puta katkum ba la pynkupbor da ka Sixth Schedule, kumta ka long kaba donkam bha ban nang pynkhlaiñ shuh shuh ïa ka District Council.
U la ong, ba ym dei ban dei tang ki jaidbynriew jong ka jylla ki ban kynmaw burom ïa u Rev. JJM Nichols Roy hynrei baroh ki riewlum baroh kiba don ha ri India ki dei ban pyndonburom kyrpang ïa u Rev. JJM Nichols Roy uba la thaw ïa ka Sixth Schedule ha ka riti synshar ka ri.
Katba na ka liang jong u CEM ka KHADC u Bah Pynïaid Sing Syiem haba kren kum u Symbud Kongsan u la ong, naduh u snem 1952 u Rev. JJM Nichols Roy u la ai ka jingithuh bad ka jingïada ïa ki riewlum ha ka thaiñ shatei lam-mihngi bad dei na ka jingtrei shitom jong une u khraw pyrkhat ba la ïoh ïa ki District Council ha kane ka ri bad ka Meghalaya mynta ka don 3 tylli ki District Council.
“Hadien ba u Rev. JJM Nichols Roy u la lah ban pynïoh ïa ka Sixth Schedule, mynta ka shong ha ngi kumno ban pyntyllun ïa ka kam bad kumno ban pynsngewthuh sha ki paidbah shaphang ka jinglong kongsan jong ka District Council,” la ong u Bah Pyniaid.
Ha kane ka sngi na ka liang u Kongsan bad u Symbud Kongsan ki la ïoh ruh ban sam ïa ki khusnam sha ki nongjop ha ki jingïakob bapher bapher ba la pynlong kum ka jingkynmaw burom ïa ka lyngkhuh sngi ïap jong u Rev. JJM Nichols Roy.
Ha kane ka sngi la ïadon lang ruh da u Nongïalam ka Liang Pyrshah ka ïingdorbar thawaiñ ka jylla u Bah RV Lyngdoh, u Chairman ka KHADC u Bah Lamphrang Blah, ki MDC ka KHADC, u Principal jong ka Rev. JJM Nichols Roy College u Rev. Dr. R.G.M Sohkhia, ki nongïalam Balang jong ka Church of God, ki nonghikai, ki khynnah pule bad kiwei kiwei.
