Nongstoiñ, Naiwieng 01
Ka Hynñiewtrep Youths’ Council (HYC) West Khasi Hills District ha ka Sngi Balang ka taïew ka la leit ban ïakynduh ïa u Deputy Commissioner (DC) ka West Khasi Hills halor ka thung kam thung jam lyngba ka District Selection Committee.
U President ka HYC West Khasi Hills, samla Lumlang Kharsyiemlieh u la ong ba ha ka dorkhas ïa kaba la aiti sha u DC, ka seng ka la dawa ban pynbeit noh ïa ki eksam ba ki samla wad kam ki la ap slem.
“Hooid ngi sngewthuh ba ka jingslem kawei ka dei na ka jingpynbeit ïa ka Roster System, hynrei mynta ka la dei ka por ïa ka DSC ban sdang noh namar lada pynslem eh ka pynduh mynsiem ïa ki samla wad kam, khamtam kiba la jan kut ka rta ban wad kam,” la ong u samla Lumlang.
Shuh shuh ka seng ka la pynpaw ruh ba ka DSC ka dei ban khuid ha ka jingpynïaid ban shngaiñ ki samla wad kam.
U la ong ruh ba ha ka dorkhas la pynpaw ba ha ka por thoh eksam ba la pynbeit da ka DSC ym dei ban shah rah mobile kumba long ha ki por ba la dep. Kane kam ai jingshaniah ïa ki samla wad kam namar kumba la ïathuh ki samla wad kam ha kine ki snem ba la dep, la plie lypa ïa ki muhor (seal) ki jingkylli. Lada ka long kumta ki samla wad kam kin duh jingshaniah ïa ka DSC.
Shuh shuh u la ong ruh ba la pynpaw ruh ba kum ïa ki Post Grade IV dei ban set jingkylli da ka ktien Khasi, namar ka DSC ka pan kyrdan Klass VIII ter ter lada ai da ki jingkylli ha ka ktien phareng long kumba leh shiliang ïa kiba hapoh Klass X, bad ban da buh kor CCTV ha ka por pynlong eksam bapher bapher hapoh ka jingpeit ka DSC.
U samla Lumlang u la ong ruh ba ha ka jingïakynduh bad u DC, u la kular ban shimkhia ïa ki jingdawa ha kaba u DC u la ong ruh ba ka la dei ka por ba ki briew kiba stad kin ïoh kam ban kiew ka District.
U la ong ba ka Sorkar kan kham pyrkhing bha, kan buh ki Zonal Officers ban peit bniah bad pynbiang ki SOP bad shuwa ka jingthoh eksam DSC yn pynbna paidbah bad ha ki khubor khnang kin tip.
Nalor kata, u samla Lumlang u la ïathuh ruh ba u DC u la ong ba un shimkhia ïa ka jingdawa namar ma u ruh u kwah ba ka DSC kan khuid bad ban ïoh ïa ki samla ba stad ban kyntiew ïa ka dong ka thaiñ ha ka trei ha ki tnat Sorkar.
