Tura, Naiwieng:
Uwei u nongtrei mon sngewbha na East Garo Hills u la kynnoh ba ka don ka jingbym larkam na ka liang ka Dobu Public Health Centre (PHC) hapoh ka distrik ban pyllait ïa ka song pisa JSY sha ki longkmie bad kiwei-kiwei ki jingsiew sha ki ASHA hadien ba la kha ïa i khyllung ha ka PHC.
Utei u nongtrei mon sngewbha, u Tambu Sangma u la kynnoh ba wat la ka jubab RTI na ka ophis District Medical & Health Officer ka kam ba ju pyllait man la ka por ïa katei ka song pisa sha ki kmie bad ASHA, ki ASHA ha kawei ka liang ki la kyntait ba ki la ïoh pdiang ïa katei kajuh naduh u snem 2015.
“Na bynta ban pynshisha shuh ïa kane, nga la kylli na ki ASHA bad ki kmie ba la ju siew ne em ïa ka song JSY lem bad kiwei-kiwei ki jingsiew jong ki ASHA ne ki ju poi ne em sha ki ‘Bank Account’. Hynrei, katto-katne na ki kmie ki la jubab ba kim shym la ïoh pdiang ïa kitei ki song naduh u snem 2015. Ïa ka song JSY la ai da ka Sorkar Pdeng sha man la ka kmie hadien ba ki la kha khyllung ha kano-kano ka jaka sumar ba la ithuh da ka Sorkar ne PHC, kumjuh sha baroh ki ASHA na bynta ka jingkitkhia jong ki hapoh katei ka song jingsiew,” ong u Sangma ha ka kyrwoh.
Katkum ka jingsngew u Sangma, hadien ba la kylli na ki ASHA, ma ki ruh ki la kyntait ba ki la ïoh pdiang ïa kitei ki song jingïarap.
“Nga la kylli ruh na ki ASHA halor kiba bun ki song jingsiew – kiba la pyni ba la dep siew ha ka jubab RTI jong nga na ophis DMHO, Williamnagar. Hynrei, kim don jingtip shaphang katto-katne na kitei ki song jingsiew watla ka pyni ba la dep siew ha ka jubab,” kam u Sangma.
