Shillong, Naiwieng 01
Ka Khasi Hills Autonomous District Council (KHADC) ha ka Sngi Balang ka la ïoh ban rakhe kynmaw burom ïa ka lyngkhuh sngi ïap kaba 64 jong u Rev. JJM Nichols Roy uba long u kpa jong ka Khyrnit ba Hynriew ka riti synshar ka ri.
Ïa kane ka jingrakhe kynmaw burom la pynlong ha phyllaw jong ka KHADC. Ha shwa ban sdang ïa ka jingïalang ka la don ka jingleit buh syntiew ha u mot dur jong u Rev. JJM Nichols Roy ba la pynïeng ha phyllaw ka council da u CEM, Deputy CEM, ki EM, MDC, u Chairman, Deputy Chairman lem bad ki ophisar jong ka council.
Haba ai jingkren ha ka jingïalang kaba lyngkot, u Chief Executive Member ka KHADC u Bah Pynïaid Sing Syiem u la ong, ka 1 tarik u Naiwieng ka long ka sngi kaba kongsan ha kaba la ïoh ban kynmaw burom ïa ka lyngkhuh sngi ïap jong u Rev. JJM Nichols Roy uba long u Kpa jong ka Khyrnit ba Hynriew (Sixth Schedule) ne u Kpa jong ki District Council.
U la ong, ba u Rev. Nichols Roy u dei uba stad bad uba shemphang uba la lah ban pynkohnguh ïa ki nongïalam kiba stad ha ka ri India ban thaw ïa ka Sixth Schedule kaba ïeng ban ïada ïa ki riewlum kiba don ha ka ri lyngba ka riti synshar ka ri.
U la ong ba ka KHADC ka la khot ïa ki Scholar bad Researcher halor ki 18 tylli ki bynta jong ka jaidbynriew bad ki la don haduh 90 ngut kiba la aplai bad kiba ka Council ka la pdiang ka long ïa ki 40 ngut ba kin pynlong ïa ka jingwad bniah.
Ha kawei pat ka liang, u CEM u la pynpaw ïa ka jingsngewsih ïa ka jingmih ki kynhun kiba kwah ban pynduh noh ïa ki District Council, katba kiwei pat ki jylla ki kwah ban don ïa ka District Council. Kumta u la kyntu ïa kiba kwah ban pynduh ïa ka District Council ba kin wan ban ïakynduh ïa u bad kiwei ki MDC ba kin ai ka jingbatai kaba bniah shaphang ka District Council.
U la ong ba ka Council ka la ïakhun ïa bun tylli ki mukotduma ban ïada ïa ka jinglong kyrpang jong ka jaidbynriew bad kaba sngewtynnad ka long ba ka Council kala jop bun tylli ki mukotduma.
Ha kane ka jingïalang kaba la pynïaid da u Deputy Chairman u Bah Charles Marngar, la ïoh ruh ka jingkren na u Chairman ka KHADC u Bah Lamphrang Blah bad u MDC shi sieh u Bah Bindo M Lanong.
