Shillong, Naiwieng 02
Wat la u kyrtong ka NPP uba dei ruh u MLA barim u la shah rem ha ka ilekshon MLA na West Shillong konstitwensi Bah M. Rapsang hynrei ki don saw ngut ki nongkitkam kiba hakhmat jong u Bah Rapsang kiba la mih shakhmat ban pan tiket na ka seng NPP ban ïakhun ïa ka ilekshon MDC na Jaïaw konstitwensi.
Haba pyrshang ban ïakren bad u Bah Rapsang uba dei u MLA barim um kwah ban ïathuh ïa ki kyrteng, hynrei u la pyntip ba ki don kumba saw ngut kiba la tyrwa ba ki kwah ban pan tiket na ka seng NPP.
U la ïathuh ba shen un sa lum noh ïa ka jingïalang ban shim ïa kawei ka rai ban jied tang uwei u kyrtong ban phah sha ka State Election Committee.
Namar kata, u don jingkyrmen ba u kyrtong ka NPP un ïoh ïa ka jingjop ha ka ilekshon MDC namar ka dei ka seng kaba don ha ka sorkar bad synshar ha KHADC.
Haduh mynta kiba la paw kyrteng ban ïakhun ïa ka ilekshon MDC na Jaïaw konstitwensi ki long ka UDP, ka KHNAM, VPP, Congress bad ka NPP ka seng kaba bat ïa ka bor synshar ha sorkar jylla bad KHADC.
