Umsning, Naiwieng:
Ka Balawan College, Umsning ha Ri-Bhoi distrik ka la plie ïa ka BA Evening Section ha ka Sngi Balang.
Ha kane ka jingplie la don ryngkat lang u Bah Barnabas Nongbah kum u kongsan bad u Rev. Fr. Pius Shadap kum u symbud kongsan.
La sakhi lang ruh da u Rev. Fr. L. Kharluni, Principal jong katei ka college, ki nonghikai, ki riewrangbah, bad ki khynnah skul.
La sdang ïa kane ka jingplie da ka jingpdiang sngewbha na u Babu Boniface Lyngdoh uba dei ruh u Principal in-charge jong ka Evening Section. La don ka jingshad na ki khynnah skul bad jingrwai na ka Balawan Voices.
Haba ai jingkren, u symbud kongsan u la pynpaw ka jingsngewnguh ïa ki nongpynïaid ka College ba ki la lah ban pynurlong ïa ka jingthmu ban ïarap ïa ki khynnah bym don lad ban leit skul mynsngi da kaba plie ïa kane ka skul miet Bachelor of Arts.
Na ka liang u kongsan pat u la pynkynmaw ïa ki khynnah ba ki dei ban trei shitom da kaba ai nuksa ïa ki briew ki baduk hynrei ki la kiew ha ka imlang sahlang na ka daw jong ki skul miet ha ka jylla jong ngi. U kongsan u la pyllait paidbah ruh ïa ka College Anthem ba la pynbit pynbiang da ki nongpynïaid College.
