Shillong, Naiwieng 09
Ki nonghikai Deficit kiba don hapoh ka shatri jong ka Khasi Jaiñtia Deficit School Teachers’ Association (KJDSTA) ki la pynbna paidbah ba kin sdang ban pynlong ka jingïakhih ba khlem buh por (Indefinite Strike) naduh ka 11 tarik u Naiwieng 2026.
Ïa kane ka rai la pyntip da u President ka KJDSTA u Babu Boswell S. Pala haba kren bad ki nongthoh khubor ha ka Lah Sngi U Blei, u la ong ba ka kynhun ka shim ïa kane ka rai ban pynlong da ka jingïakhih ba khlem buh por ka dei namar ba ka Sorkar ka leh mynthi ban pynurlong ïa ki jingdawa kiba la sahteng la slem bad ruh haba ïadei ka jingleh kyllaiñ jong ka ban jubab ïa ki jingpan jingshai jong ka kynhun haba ïadei ki jingïakren.
U Babu Boswell u la pynshai haba ïadei ki jingïakren ka kynhun bad ka Sorkar kumjuh ïa ki mat ba ka kynhun ka dawa ban pynurlong, u la ong ba ka Sorkar ka leh mynthi ban pynurlong ïa ka Central Provident Fund (CPF), ka National Pension System (NPS), ka Scheme 2023 bad ka jingbymweng ka Sorkar ïa ka Scheme 2026.
Shuh-shuh u la ong ba ïa ka CPF kaba long 10% na ka tulop jong ki nonghikai ruh khlem pat pynlait, ka jingdawa ka KJDSTA ban weng ïa ka Structured Pay Framework (SPF) na ka Deficit System ruh khlem pat weng da kaba bynrap ba ki dang bun kiwei ki mat kiba ka kynhun ka la dawa ban donkam ban don da ka jingïakren kaba bniah bad ba sani, ïa kaba ka Sorkar ka kuman haduh kine ki sngi.
Haba ïadei ka jingkular ka Sorkar ban pynlait noh ïa ka DA ba 51% bad ba 53%, u Babu Boswell u la kynnoh ba ka Sorkar ka la shu leh kamkai, u la ïathuh ba ha ka 8 tarik u Risaw 2026 ka la kular ban pynlait hashuwa jong ka shuti puja, katba haduh ba la kut ka puja ruh ki nonghikai ki khlem pat ïoh eiei.
Haba ïadei ka jingïai kren ka Sorkar ban ïakren pynbeit noh ïa kine ki jingdawa bad ki jingeh jong ki nonghikai u Babu Boswell u la ong ba na ka liang ka kynhun ka long kaba la kloi ban wan ha ka miej jong ka jingïakren da kaba ban jur ba ka jingïakren ka dei ban long kaba seisoh bad kaba don jingmut.
U la ong ba kane ka jingshim rai ka KJDSTA ban pynlong da ka jingïakhih ba khlem buh por ka long ban kam lah shuh ban shah bad ban ïai sngap ïa ki jingshah ban beiñ ïa ki hok jong ki ïa kaba u la bynrap ba ïa kane ka rai la mynjur da ka ‘Resolution’ kaba dang shu dep ban long myn ha ka 7 tarik u Naiwieng 2026.
U la kyntu ïa ki kmie ki kpa, ki khynnah pule ba kin ïaishah katto katne por bad ka kynhun kumjuh ruh u la kyrpad ba kin ai ka jingkyrshan ha kane ka jingïakhih ki nonghikai kiba dawa ïa ka hok jong ki.
