Shillong, Naiwieng 05
Namar ka jingshah ktah ki khun samla bad ka ïing ka sem jong kito kiba la ngop ha u jingdih basniew kata u drok, ka Mawlai Town Dorbar (MTD) ka la shim ïa ka sienjam bad pyni da ki kam ha ryngkat u MDC ka Mawlai u Bah Teiborlang Pathaw ban btin lynti bad pynbha pat ïa kito kiba kyrni ha u drok khnang ba kin lah ban lait na une u jingdih basniew bad ban wanphai pat sha ka lynti ban ïoh ïa ka jingim kaba thymmai ha ka imlang sahlang.
Ha kane ka sienjam kaba la shim ban pynbha pat ïa ki khun samla, ka Mawlai Town Dorbar ka la ïatreilang bad ka Manbha Foundation na ka bynta ban ïasyllok bad sumar ïa ki samla kiba la shahteh shahkhum ha u drok. Kine ki samla ki dei kiba la pyni ïa ka mon baskhem jong ki bad kloi ban iehnoh ïa une u jingdih basniew lyngba ka jingïasyllok bad jingshah sumar ha ka jaka kaba la pynbiang da u MDC ka Mawlai konstitwensi.
Haba ai jingkren ha kane ka jingïalang, u MDC u la pynkynmaw ïa ka thong kaba ma u kum u nongmihkhmat ka Mawlai naduh ba u la shahjied u la don ka jingpyrkhat kumno ban ïakhun ïa une u jingdih basniew uba la ktah ym tang ïa ki khun samla, hynrei ïa ka ïing ka sem bad ka jaitbynriew ruh kumjuh.
U Bah Teiborlang Pathaw u la pynpaw ka jingdiaw namar kum u nongmihkhmat u ïakynduh bun ki longïing kiba kyrduh ha kaba ki don ki khun ki la ngop ha une u jingdih uba sniew, bad kito kiba la kyrni ha u drok ki mad jingeh haduh katta katta. Kumta u MDC u la ai ka jingïaroh ïa ka Mawlai Town Dorbar lem bad ki Rangbah Shnong bad nongkitkam kiba la shimkhia lang kumno ban ïakhun pyrshah ïa une u jingdih basniew da kaba ai lang ka kti ban btin ïa ki samla kiba dang khie dang san kiba la shah ïalam bakla ha une u jingdih.
Ha kane ka sngi, la wan ban ai jingkren ruh da ka Dr Rica Lamarr na ka Manbha Foundation, u SP (City) ka East Khasi Hills district Bah Vivek Syiem bad ïa ka jingïalang la pynïaid da u Bah Marco Mitri, uba dei u Secretary ka Mawlai Town Dorbar ha ka jingdonlang ki Rangbah Shnong bad ki nongkitkam jong ki shnong kiba don ha Mawlai, lem bad ki bahaïing hasem jong ki samla kiba la kwah ban iehnoh ïa u drok.
Na ka liang u Bah Vivek Syiem bad Dr Rica Lamarr ki la ai ki jingbatai shaphang ka jingsniew jong u drok bad ka jingma namar ka Thaiñ Shatei Lam Mihngi ka don marjan bad ki ri kiba tip kum ka Golden Triangle kita ka Myanmar, Thailand, bad Laos. Ka Dr Lamarr ka la batai ruh shaphang ka jingdonbynta ka Manbha Foundation ban sumar bad pynbha pat ïa kiba kyrni ha une u jingdih bad ka kyrmen ba da ka jingïatreilang ki longïing longsem yn sa lah ban jop ïa ki jingeh.
U Bah Vivek u la pynkynmaw ruh ba ha u snem 2011 haba ïoh kurup drok na Mawlai, kam pat dei eh kaba ki briew kin pyrkhat ba ki ïing ki sem bad ki shnong ki thaw kin shah ktah, hynrei mynta, une u jingdih u la buh jingma haduh katta katta ïa ka imlang ka sahlang bad ïa ka Jylla hi baroh kawei. Kumta ki la kyntu ïa ki Dorbar Shnong bad ki nongshong shnong ban ïatreilang khnang ban lah tehlakam bad rat dyngkhong ïa une u jingdih uba la ktah ïa ki samla ym tang ha nongbah Shillong hynrei ha kylleng ki district.
Wat la ki la don bun ngut kiba la pynpaw ka jingthrang ban wanphai sha kane ka lynti, hynrei kiba la poi sha kane ka jingïalang kaba la pynlong ha Shillong Polytechnic Mawlai ha ka Sngi Saitjaiñ ka 4 tarik Naiwieng, 2023, ki don kumba 21 ngut ki samla.
Ïa kine ki samla yn pynsah ha kawei ka jaka ban ïasyllok bad ki bad kane ka jaka ka dei kaba la pynïoh da u MDC, u Bah Teiborlang Pathaw.
