Shillong, Naiwieng 26
Namar ba ka sorkar jylla kam pat lah ban pynïoh hall la ka jong ban pyni ïa ki phlim Khasi, kumta u trai jong ka phlim ‘Rai-eh’ un sdang ban pyni nyngkong ïa kane ka phlim ha Khasi National Dorbar Hall Mawkhar naduh lashai ka sngi ka 27 tarik Naiwieng, 2023 haduh ka 2 tarik Nohprah, 2023 man ka sngi.
Ka por ban pyni ïa kane ka phlim ka long naduh 11:30 mynstep, 2:00 baje nohphai sngi, 5:00 baje janmiet bad 7:00 baje mynmiet.
Ïa kane ka phlim la ak da u Bah Amazing Kurbah uba dei u khlur ïalap ilekshon ha Sohïong konstitwensi, ka Meda Basaïawmoit, Kynsai Lynshiang, Bahdeng Dohtdong bad la direk da u Bah Kit Rina Nongrum.
Kane ka jingsdang ban pyni nyngkong ïa kane phlim ha Mawkhar ka dei namar ha Bijou Cinema, Shillong kaba don ha Khyndailad ka bun palat ka jinglut naduh ban siew ïa ka bai UFO ban shna ha Mumbai haduh T.70,000, ka GST kaba 18 percent bad hap ïa sam mar shiteng u trai phlim bad u trai Bijou Cinema hadien ba la dep ot ïa ka GST.
Haba ïakren bad u Bah Kit Rina Nongrum u la ïathuh ba la dep ïoh syrnot na Guwahati bad kumjuh ban ap pali ha Bijou Cinema, hynrei namar ba ka pali ka dang jrong bad ka bun palat ka jinglut, kumta u la hap ban pyni noh ha Mawkhar.
U la ïathuh ba kane ka dei ka sien kaba nyngkong ba ki phlim Khasi kin sdang ban pyni ha Mawkhar namar baroh shi katta ki phlim Khasi ki hap ban ap pali beit ha Bijou Cinema.
U la ïathuh ruh ba u trai Bijou Cinema u ju pyntip ban pyni ïa ki phlim Khasi tang hapoh shi taïew lada ym don ki phlim Hindi ki bym ïaid bad ka buh jingeh ïa ki phlim Khasi ban pynbna sha ki paidbah.
Nalor kane, u Bah Kit Rina u la pyntip ba ha Mawkhar kin pyni naduh ka 27 tarik Naiwieng haduh 2 tarik Nohprah 2023; kaba mut tang ha ka sngi poh-ïa katba ha ka Sngi U Blei kin nym ïoh lad shuh namar kim pat shah.
Namar kata, u don jingkyrmen ba wat la ka dei tang ka jingpyrshang hynrei ki paidbah kin wan ban ai jingkyrshan ïa ka phlim ‘Rai-eh’ khnang ba kiwei ki phlim Khasi kin ïohlad ban pyni ha kane ka hall.
Shuh shuh u la pynpaw ba lada pyni phlim Khasi ha Mawkhar ki ban ïaid ki dukan Khasi ki long naduh ki dukan sha, ki dukan ja, ki dukan waidong bad kiwei ki dukan, katba da pyni ha Bijou Cinema ki dukan jong kiwei ki jaidbynriew kin kamai bha.
