Nongstoiñ, Rymphang 11
U Nongïalam ba ha khlieh duh ka National People’s Party (NPP), Conrad K Sangma uba dei ruh u Myntri Rangbah ka Jylla, ha ka Sngi Ba-ar u la hiar sha Nongstoiñ ban ïalap ilekshon bad ban pan ruh ka jingkyrshan ïa u kyrtong jong ka NPP na Nongstoiñ u Bah Dressar Marngar.
U Conrad haba ai jingkren ha ka jingïalang kaba la long hapoh Bishop Hall Nongstoiñ, u la kyntu ïa ki nongthep vote ba kim dei ban ngop ha ki jingkren jong ki seng saiñpyrthei kiba pyrshang ban pynthame bad pynsaphriang ïa ki jingtip ba bakla, bad ha kaba u la pan ïa ka rai u paidbah ban kyrshan radbah ïa ka NPP kaba synshar ïa ka Jylla.
“Kin don bad mih shibun ki jingkynthoh bad kynnoh ha ka por ilekshon, hynrei hadien ba ki la kut, ki briew kin sa kren biang shaphang ka roi ka par, ka jingim, bad ka jingkyrshan kaba ki donkam”, u la ong bad bynrap shuh shuh, da kaba ong “Ka seng jong ngi ka dei kaba bun paid ha ka ïingdorbar thawaiñ. Dei tang ka NPP kaba lah ban ai ka jingkyrshan kaba donkam bad ban wanrah ïa ka roi ka par kaba ngi dei hok ban ïoh. Kumta ka long kaba donkam eh ba ngin jied ïa ka Sorkar kaba lah ban pyndep ïa ka roi ka par.”
“Ngim dei ban pyrkhat da kumwei pat hynrei ban jied ïa ka seng kaba synshar”, u la pynskhem.
Haba pynpaw ïa ka jingshimkhia jong ka NPP na ka bynta ka bha ka miat jong ki paidbah, u la kynthoh, “Bun kin dawa bad kular ha ka saiñ pyrthei, hynrei ngi don hangne ban shakri ïa ki paidbah bad ban wanrah ïa ka roi ka par. Kata ka dei ka jingsynshar. Balei ngin buddien ïa ki jingkynnoh bym don nongrim haba hadien ka ilekshon kito kiba pynlong ïa ki kin jah noh ryngkat bad ki jingkular jong ki? Pyrkhat kaei ka ban jia hadien ka 24 tarik u Rymphang.”
Haba kren halor ka jingtih dewïong ba la pynjari hapoh ka Jylla, une u Nongïalam ka NPP u la ong, ka dei tang ka NPP kaba la leit tynruh ïa ka hukum khang tih dewïong bad ka la jop ruh ha kaba mynta ka la ïoh ïa ka jingbit ban sdang noh ïa ka jingtih dewïong katkum ka jingstad saïan.
“Ki ophisar na ka Coal Ministry ki la dep wan jurip ïa ki par ha Rilum Jaiñtia bad shen kin sa wan jurip sa ïa ki par ha West Khasi Hills ruh. Ngi la lah ban weng ïa kawei na ki jingtynjuh kaba khraw bha bad ngi kyrmen ba kin sa wanrah ïa ki jingkylla kiba bha,” u la ong.
U la pynthikna ïa ki nongtih par tynrai ba kin ym donkam shuh ban ïaid lyngba ka jingmynjur kaba pyrkhing bha na ka bynta ban tih par. “Ki nongtih shyiap bad kiwei kiwei ki par kiba rit, kiba hapoh 10,000 sqft, ki la kyntu ban pyllait na ki kyndon kiba pyrkhing bha,” u la ong.
“Kum ka Sorkar ngi la leit ïakren sha Delhi ban pyllait ïa ki na ki kyndon kiba pyrkhing bha na ka bynta ki nongtih par barit-baria. Ngi thmu ban pynthikna ba ki nongtih par tynrai kin ym hap ban ïakynduh ïa kine ki jingeh,” u la ong.
U la pynpaw ruh ïa ki jingthmu jong ka Sorkar na ka bynta ban kyntiew ïa ki kam ïalehkai, ka pule puthi, bad ki jingtei ha kylleng ka jylla. U la kdew ba ka jingtei ïa ka madan ïalehkai phutbol bad ka madan ïalehkai track-and-field ha Nongstoiñ ka ïeng kum ka jingpynshisha ïa ka jingshimkhia jong ka NPP ïa ki paidbah.
