Shillong, Rymphang 11
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem u la kyntu ban pynbeit biang ïa ka ‘electoral roll’ lane ka thup kyrteng jong ki nongthep ‘vote’ ban jied ïa ki MDC, namar la shem ïa ka kyrteng ki bar Jylla bad bym dei ki Khasi.
Halor kane ka jingshem ïa ka jingdon ki kyrteng jong ki bym dei Khasi ha ka thup kyrteng nongjied MDC, u Bah Pynïaid uba dei u kyrtong ka NPP na Nongthymmai ha ka Sngi Ba-ar u la leit ban aiti ïa ka shithi ha shlem treikam jong ka Deputy Commissioner ban dawa pynbeit biang ïa ka thup kyrteng.
Haba kren sha ki lad pathai u la ïathuh ba u la ïoh ïakren ïa ka DC, Kong RM Kurbah da ka phone namar kane ka heh ophisar ka don da kiwei ki kam shabar ka ophis.
“Ha ka ‘electoral roll’ ba la dep ban pynmih da ka shlem treikam jong ka Deputy Commissioner la lap bun tylli ki kyrteng jong ki bym dei ki riewlum. Ki don ruh ki kyrteng jong kiwei pat ki riewlum ki bym dei ki Khasi kiba la paw ha ka ‘electoral roll’ jong ka KHADC”, u la ïathuh da kaba ong ruh ba kine ar tylli ki mat kiba u sngewkhia.
U Bah Pynïaid u la ong ba ka jingujor sha ka DC halor ka ‘electoral roll’ ka long namar ba u don ka jingsngewkhia ba ka dei ka ilekshon sha ka KHADC, bad ki nongjied ïa ki MDC ki dei ban long beit da ki Khasi.
Namar ka jingbym ïoh ban ïakynduh ïa ka DC na ka liang u Bah Pynïaid u la ong ba um pat lah ban ong eiei ïa ki sienjam, hynrei un ap ïa ka jubab na ka ophis jong ka DC.
“Nga kyrpad ïa phi ban shim khia bha ïa kane ka kam bad ban leh eiei ha ka ban pynkloi ïa ka jingpynbeit hapoh ka por kaba biang, haba buh ha ka jingpyrkhat ïa ka jingkongsan ka thup ba beit jong ki nongthep ‘vote’ ban lah pynlong ïa ka ilekshon kaba jop”, la ong u Bah Pynïaid ha ka shithi.
