Jowai, Rymphang 11
Ka Dorbar Shnong Mukroh da ka jingmynjur lang jong baroh ki nongshong shnong ki la rai ban weng noh ïa ka jingbym ïashim bynta ne boycott ïa ka ilekshon sha ka ïingdorbar thawaiñ jong ka JHADC ha ryngkat ka kyndon ba ka Sorkar kan ai da ka jingthoh ïa ki nongïalam shnong ba kin buh ïa ka BOP jong ki pulit Meghalaya ha Mootha Siangkwai ne ka Zero-point jong ka shnong Mukroh ha ne shwa ka 18 tarik mynta u bnai.
Ïa kane ka rai la shim ha ka dorbar ba la khot pynlong hadien ba ka dorbar shnong ka la ïohpdiang ïa ka jingkyrpad na ki bor District ban weng noh ïa katei ka jingbym ïashim bynta ha ka ilekshon MDC ha ka sngi nyngkong mynta taïew ha madan phutbol Mukroh.
Ha katei ka dorbar la wan ïashim bynta da u Assistant Commissioner jong ka West Jaiñtia Hills District bad uba long ruh u Returning Officer jong ka Barato Mukroh Konstitwensi Ma GH Passah.
Ha katei ka dorbar, ki nongïalam shnong kila pynpaw ïa ki jingdawa jong ki hakhmat u Ma Passah kiba kynthup ïa ka jingbuh ïa ka BOP jong ki pulit Meghalaya ha Mootha Siangkwai ne ka Zero Point jong ka shnong Mukroh kaba long ka mat jingdawa kaba donkam eh bad ki nongïalam shnong ki la ong ba ka jingdon jong ka BOP ha katei ka jaka kan wanrah ïa ka jingshong shngaiñ ha ka thaiñ khappud bad ïarap ruh ban tehlakam ïa kino-kino ki jingïakajia ha thaiñ khappud bad ha ki shnong Pnar sha Block I.
Ki nongïalam shnong ki la dawa ba dei ban ai jingpahara da ki pulit jong ka Meghalaya baroh 24 kynta ha ka shisngi ha ki thaiñ khappud jong ka shnong Mukroh khnang ban ai jingïada ïa ki nongshong shnong na kino-kino ki riew shim kabu. Ki la dawa ruh ba dei ban weng bad pynsangeh ïa ki jingshna beaiñ jong ka Sorkar Assam ne KAAC ha ki thaiñ khappud jong ka shnong Mukroh bad kila dawa ba dei ban pynsangeh noh ïa kino-kino ki jingpyndik jingpyntieng pynsmiej da ki katto katne ki kynhun ne riew shim kabu ïa ki nongshong shnong haba ki leit sha ki thaiñ khappud.
U Ma Passah u la kular ban rah ïa ka jingdawa jong ki ban buh BOP ha Mootha Siangkwai ne Zero Point ha ki bor kiba halor bad u la pyntip ba ka bor district kila pynbeit ban pynlong ïa ka jingïalang paidbah bad ki nongshong Mukroh ha ka 26 tarik mynta u bnai na ka bynta ban ïakren halor ka khia ka shon bad ki jingeh ba ïakynduh da ka shnong Mukroh bad u la kyntu ïa ki nongshong shnong ba kin ïashim bynta ha ka ilekshon MDC JHADC.
Halor kitei ki jingpynshai, ka dorbar kala rai ban weng noh ban boycott ïa ka ilekshon sha ka ïingdorbar thawaiñ jong ka JHADC.
