Jowai, Rymphang 11
Ka la don ka jingpyrshang ban pynthut ïa ki jingïalang na ka bynta ka ilekshon sha JHADC ha ar tylli ki shnong kiba hap ha ka Block-I ha ka Sngi Ba-ar hynrei ka jingïalang ka la ïaid beit ïaid ryntih kumba la pynbeit.
Ha ka jingjia ba nyngkong kaba la jia ha ka por mynstep ha ka shnong Shnongthymme ha Block I kaba dei sha ki thaiñ Mowluber, Mowjem hapoh ka Barato Mukroh Konstitwensi ha ka por ba long jingïalang ka kyrtong jong ka Indian National Congress ka Kong Banikas Laban.
La ong ba kumba 4-5 ngut ki briew Karbi ki la wan poi sha katei ka jaka ba long jingïalang bad ki la sdang ban ring ‘video’ bad hadien katto-katne por ki nongbud jong ka Kong Banikas Laban ki la ïoh phone na ki pulit Assam bad bthah ïa ki ban ym pynlong jingïalang ïalap ilekshon ha West Karbi Anglong District. Ka Kong Banikas ka la rai ban pynlong noh ïa ka jingïalang tang katto-katne por khnang ban lait na kino-kino ki jingjia.
Ha kawei pat ka jingjia, shi kynhun ki Karbi ki la wan poi ha ka shnong Mokoiram, ha ka por ba pynlong jingïalang ïalap ilekshon u kyrtong jong ka UDP jong ka Mynsngat Khanduli u Ma DS War.
Kitei ki briew kiba la wan poi ha katei ka jaka pynlong jingïalang ki la wohdong wohnia halor ka jingpynlong ïa ka jingïalang ha shnong West Karbi Anglong District hynrei na ka liang ki nongkyrshan u Ma DS War ki la ïatai nia bad katei ka jaka ka dang hap hapoh Meghalaya bad ban bteng ïa ka jingïalang.
