New Delhi, Naiwieng 28
Ki 41 ngut ki nongbylla kiba la sahkut hapoh kawei ka surok khrum (Tunnel) ha Silkyara, Uttarakhand, ki la ïoh ban mih noh hadien 41 sngi ha ka Sngi Ba-Ar hadien ba ka la don ka jingtih da ki briew da ka rukom kaba ïasyriem bad ka jingtih dewïong thliew khnai (rat-hole coal mining) kaba ju leh ha Meghalaya hashwa ba ka National Green Tribunal (NGT) kan khang ha u snem 2014.
Ïa kitei ki nongbylla la buh ha ki kynja krong ba la shna kyrpang bad la pynrung ïa ki lyngba u Pipe uba don ka jingïar kaba 2 metre. Ïa kine ki Pipe la phrung na kynriang jong ka jaka ba la twa.
Ha ka por ba kitei ki 41 ngut ki la mih na katei ka jaka, la sakhi lang da u Myntri Rangbah ka Uttarakhand, u Pushkar Singh Dhami.
Dei ki dkhot ka National Disaster Response Force (NDRF) kiba la rung nyngkong na kitei ki Pipe ban leit peit ïa ka jinglong jingman jong kitei ki nongbylla bad ban btin lynti ïa ki ba kin mih shabar. Man la uwei pa uwei u nongbylla u la hap thiah ha ka kynja krong bad hadien kata, la tan ïa ki shabar.
Habar jong katei ka jaka, la don 41 tylli ki kali kit nongpang, la bhah kawei ka kali na ka bynta uwei u nongbylla, bad ki la mih ban leit sha Chinyalisaur, kaba jngai kumba 30 km. Ha Chinyalisaur, la buh ïa ka jaka ai jingsumar ban peit bniah ïa ka koit ka khiah jong kitei ki nongbylla.
La pdiang sngewbha ïa kitei ki nongbylla da ki briew kiba la ïadon bynta ban pyllait ïa ki bad la pyndeng ruh ïa ki da ki syntiew. Ki bahaïing hasem jong ki nongbylla ki la ïalehkmen hadien 17 sngi ba ki khlem ïohi shuh ïa ki.
Na ka liang u Myntri Rangbahduh, u Narendra Modi, u la ai jingïaroh ïa kitei ki nongbylla bad ki bahaïing hasem jong ki bad kumjuh ruh ïa baroh kiba la ïadon bynta ban pyllait ïa ki nongbylla.
Ka la don ruh ka jingwanrah da ka liengsuiñ Chinook jong ka Air Force ïoh jia ba hap ban kit kyrkieh ïa kitei ki nongbylla.
Hynnin ka janmiet, ki briew kiba don jingtip shaphang ka jingtih dewïong thliew khnai, ki la leit sha katei ka jaka bad ki la sdang ïa ka kam. Ka jingwanrah ïa kine ki briew ka long hadien ba ka kor Augur ka la julor noh namar ka jingtakhuh bad ki maw bad ki nar rod. La donkam ban tih hi da ki briew sa kumba 12 metre ban poi syndon sha ka jaka ba don ki nongbylla.
