Shillong, Naiwieng 29
Ka Hynñiewtrep Youths’ Council (HYC) Sengkmie ka la dawa na ka Sorkar Jylla ba ka dei ban tuklar na ka bynta ban pyntreikam ïa ka ‘Office Memorandum’ jong ka Sorkar Pdeng kaba la kdew shai ba ki riewlum ki dei ban ïoh ïa ka bhah thungkam ba 44% na ka bynta ki post barit ba kynthup ha ka kyrdan Grade C bad Grade D ha ki shlem treikam ka Sorkar Pdeng.
Ka HYC ha ka Sngi Balang ka la kyrpad ïa u Myntri ka tnat Social Welfare Bah Paul Lyngdoh ba un tuklar lem ban pynthikna ba ki shlem treikam ka Sorkar Pdeng kin pyntreikam ïa ka bhah thungkam kaba 44% na ka bynta ki riewlum ka jylla Meghalaya.
Ha ka shithi kaba la aiti sha u Myntri, u President ka HYC u Bah Roy Kupar Synrem u la ong, “Ngi la kyntu ïa ka Sorkar Jylla ba kan shim ïa ki lad ki lynti ban pynthikna ba baroh ki shlem treikam, jaka pule bad kiwei kiwei kiba dei jong ka sorkar pdeng kiba don hapoh Meghalaya ba ki dei ban bud ne pyntreikam ïa ka Office Memorandum bad kiwei kiwei ki jingbthah kiba la ai da ka Sorkar Pdeng, ka Ministry of Personnel, Public Grievances and Pensions Department of Personnel and Training New Delhi, khnang ba ki samla trai ri jong ka jylla kin ïoh jingmyntoi”. Katkum ka Office Memorandum and Standing Instructions, ha Meghalaya ka Percentage jong ka Reservation ka long 1 % na ka bynta ki Scheduled Caste, 44% na ka bynta ki Scheduled Tribe bad 5 % na ka bynta ki Other Backward Class. U Bah Roy Kupar u la ong, na ka liang Myntri u la kular ban shimkhia ïa kane ka kam ban bthah ïa ki tnat treikam ka Sorkar pdeng ban bud ïa ki kyndon kymba la kdew ha ka OM ba la pynmih da ka Sorkar pdeng.
