Shillong, Naiwieng 30
Ka Kong Ampareen Lyngdoh hadien ba ka la shah jied kum ka kyrtong ban ïakhun ïa ka ilekshon MP ka ban long ha u snem ban wan, ha ka Sngi Palei ka la lum ïa ka jingïalang bad baroh ki nongïalam bad nongkitkam ka National People’s Party (NPP) na Rilum Jaiñtia Hills.
Ha kane ka jingïalang kaba la pynlong ha State Convention Centre, Shillong, kaba long ruh kum shi bynta ka dak jong ka jingsdang ban plie ïa ka jingïalap ilekshon, ka Kong Ampareen ka la pan ka jingkyrshan kaba pura na ki nongïalam bad nongkitkam na Jaiñtia Hills bad pyntip ruh ba shen kan sa hiar sha manla ki shnong jong ka district ban pan ïa ka jingkyrshan.
Na ka liang ki nongïalam bad nongkitkam kiba la wan poi sha kane ka jingïalang ki la rai ban ai ïa ka jingkyrshan kaba pura ïa ka Kong Ampareen kum ka kyrtong ka NPP ban mih aireng ha ka ilekshon MP.
Ha kane ka jingïalang, la wan ïashim bynta da baroh ki MLA ka NPP na Jaiñtia Hills naduh u Bah Sniawbhalang Dhar, Bah Comingone Ymbon, Bah Wailadmiki Shylla bad ka Kong Santa Mary Shylla, kumjuh ruh baroh ki MDC ka NPP na Jaiñtia Hills ba kynthup ruh ïa u CEM ka JHADC u Bah Thombor Shiwat.
Haba ai jingkren ha kane ka jingïalang, ka Kong Ampareen ka la ong, “Nga ainguh ïa ka seng NPP, ba ka sngew ba nga dei kata ka nongïaleh kaba la ih, tip bad kaba la nang, bad nga ong ïa phi ki nongshong shnong ka rilum Jaiñtia ba ngan sa wan ïuh kjat ha iwei pa iwei i shnong ha kine ki khyndiat bnai ban wan. Wat artatien ïa kata ka jingshimti jong nga ïa kane ka kam tang ban pyndep rukom.”
“Ngan ïaleh ban jop, hynrei ngan ym jop khlem ka jingkyrshan ka jong phi. Leit sha ki shnong ban ïathuh khana sha ki paidbah ba nga la khreh ban long ka nongshakri ïa phi. Ngan pyrshang katba lah ban pynbit pynbiang ïa phi bad ngan pyrshang katba lah ban ym leh shiliang la ka long ha ka niam ne kiwei kiwei. Ai ïa nga ka lad ban pyni ïa ka kamram jong ka MP,” la ong ka Kong Ampareen.
Nalor kane, ka la pynkynmaw ruh ba ka rilum Jaiñtia da kawei ka sur ka la pynjop donburom ïa u Bah Peter G Marbaniang (bam kwai ha dwar U Blei) uba long u kpa jong ka bad ka dap da ka jingkmen ba ka la ïoh ïa ka lad ban ïakhun ïa ka ilekshon MP bad ban buddien ïa ki dienjat kiba la ïalam da u kpa jong ka.
Katba na ka liang u Bah Sniawbhalang Dhar pat u la ong ba kane ka sngi kan dei ruh ka sngi ba kum ka NPP ka la khap ïa u ribon kum ka dak jong ka jingsdang ïa ka jingïaid ïalap ilekshon MP.
Une u nongïalam ka NPP na rilum Jaiñtia uba long ruh u Symbud Myntri Rangbah ka Jylla u la pyntip ba ka NPP naduh lashai ka sngi kan sdang ban leit ïuhkjat ha man la ki district ban ïalap ilekshon na ka bynta ka kyrtong.
