Shillong, Nohprah:
U Myntri Rangbah ka Jylla, u Conrad K. Sangma ha ka jingïalang kaba la long ha Madan Chigitchakgre, Gambegre Block, West Garo Hills u la pynbna ïa ka Chigitchakgre kum ka ‘Bee Village’ hapoh jong ka ‘Apiculture Mission 2.0’.
Haba ai jingkren ha ka jingïalang, u Sangma u la ong ba ki nongshong shnong ka Jylla khamtam ha ki jaka nongkyndong ki trei ïa ki kam bapher-bapher na bynta ka lad kamai bad ka Sorkar ha kine ki khyndiat snem ba la dep, ka la kyrshan ïa kine ki kam lyngba ki prokram ‘Mission’ bapher-bapher.
U la ong ruh ba ka jingthmu ban pynbna ïa ki shnong kum ki ‘Bee Village’ ka long ka prokram ba kyrpang hapoh ka ‘Apiculture Mission’ ba ïarap kyrshan ïa ki nongri ngap.
“Ngin ïaleh katba lah ban ïarap bad ai ka jingkyrshan kaba donkam na bynta ki nongri ngap kum ka jingai jinghikai, jingïarap pisa, synduk ngap, ki tiar ba ïadei bad ka kam ri ngap, ki ïingmala ha ryngkat ki kamra, kamra ai jinghikai bad ki jaka ban die bad pyninam ïa ki mar ki mata jong ki,” u la ong.
U la pynshai ruh sha ka jingïalang halor ka ‘CM Elevate’ bad ‘YESS Meghalaya’ bad kyntu ïa ki samla ban shim kabu ïa ki jingmyntoi na kine ki prokram.
U Myntri Rangbah u la pynbna ruh T.10 lak sha katei ka shnong (Bee Village) na ka Chief Minister’s Special Development Fund.
Na ka liang u Sangma u la ïakren bad ki samla kumjuh ki kynthei jong ka shnong ha kaba kut ka jingkren jong u.
Ha kane ka sngi la don lang ruh u Deputy Commissioner, West Garo Hills lem bad kiwei-kiwei ki heh ophisar jong ka distrik.
