Shillong, Nohprah:
U Myntri ka tnad Civil Defence & Home Guards, Bah Comingone Ymbon u la ong ba ki ar kynhun jong ka Civil Defence & Home Guards ki don ïa ka bynta kaba kongsan ha ka ban ai jingkyrshan ha kiba bun ki jingjia ba kyrkieh bad jingjia lynshop bapher-bapher.
U Bah Ymbon u la ong ïa katei haba ai jingkren kum u kongsan ha ka jingrakhe ïa ka ‘Raising Day’ kaba 61 jong ka tnad Civil Defence & Home Guards, ha CTI Parade Ground, Mawdiangdiang, Shillong.
U Myntri u la ong ruh, “Ka bynta jong ki Home Guard Volunteer ha ka ban khmih ïa ka jingpynïaid kali, ban ap pahara ïa ka Assembly Complex bad ban synran lang ïa ki pulit ban pahara ïa ki ‘Puja Pandal’ lem bad kiwei-kiwei ki jingleh tamasa ka donkam ban ai jingïaroh.”
U Bah Ymbon u la ong ba kine ar kynhun ki ai jingïarap ruh ïa ki bor distrik bad ka tnad pulit ka Jylla ha ka liang ka jingshong suk shong shngaiñ ha ki kam ba kongsan, kumjuh ha ka liang ki kam pahara jong kiba bun ki tnad treikam ka Sorkar Pdeng, Sorkar Jylla bad PSU nalor kiwei-kiwei.
Haba pynkynmaw ïa ka bynta ba kongsan jong ka tnad ha ka ban ai jinghikai ïa ki nongshong shnong halor ka Civil Defence & Disaster Management, u Myntri u la ai jingmut ïa ka tnad ban shim ruh ka jingïarap jong ki Dorbar, Nokma kumjuh ban ai jinghikai khnang ba ki lah ban ïakhun pyrshah ïa kano-kano ka jingtynjuh.
Na ka liang u Myntri u la pynsngew ba ka tnad ka la ai jinghikai ïa 7110 ngut ki ‘riew paidbah bad khynnah pule ha ka Disaster Management, Search & Rescue bad First Aid ha ki jaka sor bad nongkyndong.
U la bynrap ba ha u snem 2022-23, ki la don 2531 ngut ki ‘Home Guard Volunteer’ bad 330 ngut ki ‘Civil Defence Volunteer’ kiba la ïoh jinghikai.
Shuh shuh u Myntri u la ïathuh ba kumba 1391 ngut ki Home Guard Volunteer kiba la ïoh jinghikai ki ïadon bynta bad ki tnad treikam bapher-bapher ka Sorkar Jylla/ PSU bad ki kompeni.
Kham ha shuwa kane, u kongsan u la pyndeng ïa ki takma halor ka jingshakri hok ïa ka kam sha 5 ngut ki nongtrei ka tnad Civil Defence & Home Guards. U la sam ruh ïa ka Director General Civil Defence Disc & Commendation Certificate, MHA, New Delhi 2022, sha 12 ngut ki nongïoh pdiang.
Ka Director General of Civil Defence & Home Guards, Kong I. Nongrang, IPS, ka la sam ïa ka khusnam Director General of Civil Defence & Home Guards, Meghalaya Cash Prize &Commendation Certificate, 2021 sha 6 ngut ki CD & HG ha ryngkat ka song pisa. Kane ka long katkum ka kyrwoh na u Divisional Commandant of Home Guards, Shillong, PRO, Directorate of Civil Defence & Home Guards, Meghalaya, Shillong, Bah P.H. Shylla.
