Shillong, Nohprah 08
Ka Myntri ka koit ka khiah ka Kong Ampareen Lyngdoh ka la pynpaw ba ka sngew dei ban ai ka kynja jingsiew ïa ki rangbah na ki shnong ki bym pat ïoh surok kiba ju ïarap ban kit ïa kiba pang kiba shitom bad ki longkmie armet na ka bynta ban pynpoi ïa ki sha jaka sumar ban ïoh jingsumar bad ban kha khyllung.
Ka Kong Ampareen ka la pynpaw ïa kane haba ïakren bad ki nongthoh khubor ha ka sngi Thohdieng hadien ba ma ka dalade ka la poi sha ka shnong Mawkhyrwang ha South West Khasi Hills district kaba ym pat ïoh surok kali ha kaba ki rangbah ki ju ïarap ban kit ïa kiba pang bad ki kynthei kiba dei ban leit kha khyllung ban pynpoi ïa ki sha ka jaka ba lait kali khnang ban pynkit pat ïa ki da kali lane ambulance sha jaka sumar.
Ka Kong Ampareen ka la ong ba ha ka hi, ka la sngew dei ba kine ki rangbah ki la long kum ki “ambulance” kiba kit ïa kiba pang bad ki longkmie kiba la dei por ban leit kha khyllung namar ki la leh kaei-kaei kaba khraw ban pyllait ïa ki para briew na ka jingma.
Kumta ka la ong ba ka long kaba dei lada ai kum ka kynja jingsiew ïa kito ki rangbah kiba ju kit ïa kiba pang bad kiba armet namar ki dang don bun ki shnong kiba ym pat lait kali namar bym pat ïoh surok.
Ka la ong ba ka ïoh jingtip ba ki dang don sa kumba 79 tylli ki shnong kiba dang shaniah ha ki rangbah ban kit kumne bad dang hap ïaid kjat bun kynta ban poi sha ka jaka ba lait kali.
Ïa kiba pang ne ba armet la ju pynshong ha ka shuki bad ki don ki rangbah kiba ïa kit kylliang ban pynpoi sha jaka ba lait kali.
Kane ka Myntri ka ai jingïaroh ruh ïa ki longkmie kiba ju ïarap ban pynkha khyllung ha la ïing bad ka da banjur ban leit kha sha ki jaka sumar na ka bynta ka jingshngaiñ ïa ka kmie bad i khyllung ynda la dep kha.
Ki dang don bun tylli ki shnong kiba ym pat ïoh surok kali bad dang hap ban shaniah beit ha ki para briew ban kit ïa ki mar rep kumjuh ruh kito kiba mad jingeh ban poi sha jaka sumar namarba ka jingbym pat ïoh surok.
