Shillong, Nohprah 10
Ka rukom long ki shnong ki thaw ha ki ar tylli ki jaka ha Block-I bad Block-II ka lah ban mih jingeh haba ïakren ban pynphai ïa ki jaka ba shong ba sah ki Khasi ha kine ki jaka sha Meghalaya.
Ka tyllong khubor ka ïathuh ba kumba ka long, ki don ki jaka ba sah ki Khasi ha Block-I bad Block-II kim long tang shi jaka hynrei ki long saphriang.
Kum ka nuksa, ki don ki jaka ha Block-I bad Block-II kiba don markhap bad ka Meghalaya, tangba kiba shong ba sah kim dei ki Khasi katba ki jaka ba shong ki Khasi ki don shawei pat bad kim don hajan khappud.
Man ka por ka don ka jingpyrkhat ba ka Assam ka dei ban pynphai noh ïa ki jaka na Block-I bad Block-II sha Meghalaya. Ban shu kren ka suk hynrei ka kam ka long kaba kyllaiñ khamtam haba kiwei ki jaitbynriew ruh ki don kiba shong ha ki jaka kiba don ha kine ki ar tylli ki Block, ym ba ki shong tang ki Khasi Pnar.
Ka jingngat ki shnong bad neh sah haduh mynta ka dei namar ba la pynhap noh sha Mikir Hills ha u snem 1951 na ka United Khasi Jaiñtia Autonomous District Council ïa ki jaka ha ka por ba dang don bad ka Assam.
Hynrei ynda la ïoh ïa ka Jylla ha u snem 1972 ruh kam don kano-kano ka jinglah ban pynbeit thymmai biang ban wanrah ïa ki jaka ban pynngat bad ka Meghalaya.
La ong ba ka Meghalaya kan ïakren bad ka Assam lyngba ki jingïakren pynbeit pud haba ïadei bad ka Block-I bad Block-I tangba kane ka bynta kan wan kham hadien namar ka dei ruh kaba kham jwat.
